बर्जु । नेपाल शिक्षक माहासंघको आयोजनामा हाल देशभरका शिक्षकहरू शिक्षा ऐन जारीलगायत विभिन्न मागसहित करिब एक महिनादेखि काठमाडौंकेन्द्रित आन्दोलनमा छन् ।
सोही आन्दोलनलाई निरन्तरता दिँदै एक्येबद्धतासहित बर्जु गाउँपालिकाका मातहतका सामुदायिक विद्यालयमा अध्यापन गराउने स्थायी, अस्थाई, राहत शिक्षक तथा बाल विकास शिक्षक शिक्षक-शिक्षिका र विद्यालयका कर्मचारीहरूले आन्दोलन गरेका छन् ।
बर्जु गाउँपालिकाको नजिक रहेको खुल्ला स्थानमा पाल र ब्यानर टाँगेर उनीहरूले शान्तिपूर्ण धर्ना सुरु गरेका हुन् ।
‘मेरो आन्दोलन, मेरो सहभागिता, बलियो उपस्थिति, बलियो आन्दोलन र बलियो आन्दोलन, बलियो उपलब्धि” लेखिएको ब्यानरसहित मंगलबार बिहान ११ बजेदेखि २ बजेसम्म शान्तिपूर्ण धर्ना गरिएको हो ।
यसका साथै माग पूरा नभएसम्म यो धर्ना कार्यक्रम निरन्तर रहने नेपाल शिक्षक महासंघका अध्यक्ष विजयकुमार चौधरीले जानकारी दिए ।
‘२०३६ सालमा १० महिना आन्दोलन भयो, २०३८ सालमा १०४ दिन र २०४१ सालमा ६ महिना आन्दोलन भएको छ । हामी स्थानीय तहसम्मका नआउने शिक्षकहरू के हामी अझ घरमै बस्ने ? अब त जागौं, हाम्रो आन्दोलन हाम्रो सहभागिता जनाउनुपर्छ,’ पूर्वराहत शिक्षक समितिका अध्यक्ष आनन्दी चौधरीले बताइन् ।
इसिडी र विद्यालय कर्मचारीबाहेक तीन सयको हाराहारीमा रहेका शिक्षकहरू गर्मी र घामको राप नभनी धर्नामा बसेका छन् ।
