विराटनगर । विराटनगर महानगरपालिका-९ मेन रोडमा अवस्थित शिक्षादीप कलेजले शुक्रबार एक दिवसीय जलवायु सम्मेलन सम्पन्न गरेको छ ।
जलवायु परिवर्तनको प्रत्यक्ष असर भोगिरहिएको वर्तमान सन्दर्भमा कलेजले तेस्रो जलवायु सम्मेलन गरेको हो ।
कोशी प्रदेश सरकारको वन, पर्यटन तथा वातावरण मन्त्री सदानन्द मण्डलले उद्घाटन गरेको उक्त सम्मेलनमा कलेजमा अध्ययनरत विद्यार्थीहरूलाई आठ समूहमा विभाजन गरिएको थियो ।
उनीहरूले फरक विषयहरूमा खोज-अनुसन्धान गरी प्रतिवेदन प्रस्तुत गरेका थिए ।
विद्यार्थीहरूले मिचाहा प्रजातिका जीवहरूले नेपालको इकोसिष्टम र जनजीवनमा पारेको प्रभाव, विश्वव्यापी तापमान वृद्धि, अम्लीय वर्षा, छिटो परिवर्तन भइरहने फेसन तथा खेरजाने खानेकुरालाई वातावरणीय समस्याको रूपमा व्याख्या गरेर जानकारी दिएका थिए ।
साथै प्लाष्टिक प्रदूषण, ओजोन तह विनाश, जैविक विविधताको क्षयीकरणजस्ता विषयवस्तुसँग सम्बन्धित तथ्यहरू समेटेका थिए ।
सम्मेलनमा बोल्दै कलेजका प्रिन्सिपल ज्ञानबहादुर खड्काले सरकारले गर्नुपर्ने खोज-अनुसन्धान विद्यार्थीहरूले गरेर देखाएको बताए ।
उक्त सम्मेलनमा नेपाल विज्ञान तथा प्रविधि प्रज्ञा प्रतिष्ठान (नाष्ट) की सह–प्राज्ञ डा.इन्द्रमणि भगतले सहभागीहरूको प्रस्तुतिकरणले वातावरण प्रदूषणका विश्वव्यापीखास मुद्दाहरुको चर्चा गरिन् ।
नेपाल पनि जलवायुको परिवर्तनको चपेटामा परेको धेरै वातावरणीय असन्तुलन जोखिमहरू सहनुपरेको उनले बताइन् ।
यस्तै, वन, पर्यटन तथ वातावरण मन्त्री सदानन्द मण्डलले विद्यार्थीहरूको खोज-अनुसन्धानपछि तयार पारेको प्रतिवेदनको चर्चा गर्दै शिक्षादीप कलेजसँग सहकार्य गर्न मन्त्रालय तयार रहेको बताए ।
सो सम्मेलनमा शिक्षादीप एजुकेसन फाउन्डेसनका अध्यक्ष तथा कोशी प्रदेशसभा सदस्य भीम पराजुली, वनस्पति विज्ञहरू डा.ललितनारायण मण्डर, सञ्चालक सदस्यहरू अनिलकुमार दास, ललितनारायण मण्डल, मणिराज भट्टराई, बेदप्रसाद दाहाल, भूपेन्द्र दाहाल, थीरप्रसाद भट्टराईको उपस्थिति रहेको थियो ।
शिक्षादीप कलेजले दुई वर्षदेखि जलवायु सम्मेलन आयोजना गर्दै आइरहेको र यसलाई निरन्तरता दिँदै लगिने सम्मेलनका कन्भेनर रामचन्द्र अधिकारीले जानकारी दिए ।
