विराटनगर । कोशी प्रदेशको राजधानी विराटनगरमा पहिलोपटक खुल्ला क्यारम बोर्ड प्रतियोगिता भएको छ ।
विराटनगर-४ बुद्धचोकस्थित बुद्धोदय सहकारी संस्थाको हलमा बिहीबार र शुक्रबार गरी दुई दिवसीय क्यारम बोर्ड प्रतियोगिता सम्पन्न भएको हो ।
स्वर्गीय सन्तोष श्रेष्ठ र गणेश मल्ल (नैने)को स्मृतिमा बुद्धोदय सामाजिक सेवा मञ्चको आयोजनामा भएको प्रदेशस्तरीय उक्त प्रतियोगितामा झापा, मोरङ र सुनसरीका २४ टोलीको सहभागिता रहेको थियो ।
जसमा झापाको दमकलाई हराउँदै मोरङको दलेलीले उपाधि जित्यो । दमकलाई खेलको अन्तिम बिन्दु निल २३ अंकमा रोक्दै उपाधि जितेको दलेलीले ८० हजार रुपैयाँ नगद र प्रमाणपत्र हात पार्यो ।
उपविजेतामा सीमित हुँदै दमकले भने ४० हजार नगद र प्रमाणपत्र हात पार्यो ।
प्रथम बनेका रोशन लिम्बु र लक्की लामा तथा द्वितीय हुने दिमन लिम्बु र अनमोल मगरलाई आयोजक मञ्चको अभिभावक संस्था बुद्धोदय सहकारी संस्थाका अध्यक्ष राजेन्द्रप्रसाद खनालले पुरस्कार वितरण गरे ।
प्रथम संस्करणको उक्त प्रतियोगितामा सहभागी खेलाडीहरूको संख्या र दर्शकको उत्साहजनक उपस्थितिले आफूहरूलाई हौसला प्रदान गरेको उनले बताए ।
प्रतियोगिताको सेमिफाइनलमा दमकले धरानलाई र दलेलीले विराटनगरलाई हराउँदै उपाधिनजिक स्थान पक्का गरेको थियो ।
प्रतियोगितालाई सभ्य, भव्य, मर्यादित र अनुशासित बनाउन प्रत्येक खेलमा दुई-दुई जना रेफ्रीको व्यवस्था गरिएको बुद्धोदय सामाजिक सेवा मञ्चका सचिव यज्ञप्रसाद खतिवडाले जानकारी दिए ।
प्रतियोगिता आयोजना गर्न दुई लाख रुपैयाँ खर्च भएको छ । देश-देशान्तरमा छरिएर रहेका बुद्धोदय सहकारीका शुभचिन्तकहरूको सहयोग रकमबाट उक्त प्रतियोगिता आयोजना गरिएको सचिव खतिवडाको भनाइ छ ।
उनका अनुसार शैलेन्द्र अधिकारीबाट ५० हजार रुपैयाँ र विभिन्न व्यक्तिहरूबाट तथा बुद्धोदय साकोसबाट २० हजार रुपैयाँ संकलन भएको थियो भने प्रत्येक टिमसँग प्रवेश शुल्कका रूपमा ३५ सय लिइएको थियो ।
प्रतियोगिताका संयोजक नवीनकुमार भट्टराईका अनुसार युवाहरूका लागि मनोरञ्जनात्मक कार्यक्रमको रूपमा आयोजित उक्त प्रतियोगिता खेलाडी प्रोत्साहन, खेल पारखीहरूलाई एकताबद्ध गराउन र युवाहरूलाई कुलतमा फस्न नदिनका लागि आयोजना भएको हो ।
प्रतियोगिता आयोजना गर्नका लागि जिल्ला प्रशासन कार्यालय र जिल्ला प्रहरी कार्यालयबाट अनुमति लिइएको थियो ।
सन्तोष दाहाल र दिनेश दाहालले विदेशबाट पठाएको साढे चार लाख रुपैयाँबाट दुई वर्षअघि स्थापित सामाजिक मञ्चले खेलकुद, शिक्षामा लगानी गर्नुका साथै गरिब दु:खीहरूका लागि सहयोगस्वरूप रकम वितरण, वृक्षरोपण गर्नेलगायतका सामाजिक कार्य गर्ने गरेको मञ्चका सदस्य आभास अधिकारीले जनाए ।
अब, आगामी दशैंमा राष्ट्रियस्तरको क्यारम बोर्ड प्रतियोगिता गराउने लक्ष्य आयोजकको छ ।
करिब डेढ सय टिमलाई सहभागी गराएर हुने प्रतियोगितामा पुरस्कार राशि पनि वृद्धि हुने आयोजकको भनाइ छ ।
अर्को प्रतियोगितामा प्रथमलाई दुई लाख ५० हजार र खसी तथा दोस्रो हुनेलाई डेढ लाख र खसी पुरस्कार दिने आयोजकको घोषणा छ ।
