सोलुखुम्बु । सोलुखुम्बु सोताङ गाउँपालिका-२ जुकेमा सामान झार्नेक्रममा बोलेरो भिरबाट खस्दा एक जनाको मृत्यु भएको छ भने अरू एक जना घाइते भएका छन् ।
जुकेस्थित भित्री सडकखण्डमा सोताङबाट जुकेतर्फ जाँदै गरेको प्र. ३-०१-०२४ च ६८१४ नम्बरको बोलेरो गाडी भीरबाट खसेको हो ।
साँझ ५:१५ बजेतिर जुकेमा रोकेर सामान झार्ने क्रममा चिप्लिएर सडकबाट अन्दाजी ३०० मिटर तल भिरमा झरी दुर्घटना हुँदा एक जनाको मृत्यु भएको हो ।
मृत्यु हुनेमा सोताङ-५ की अन्दाजी ३२ वर्षीया सरिता राई रहेको प्रहरीले जनाएको छ ।
गाडीमा सवार चार जनामध्ये सरिता राई सडकबाट अन्दाजी १०० मिटर तल भिरमा अड्किएर गम्भीर घाइते बनेकी थिइन् ।
उपचारका क्रममा उनको प्राथमिक अस्पताल सोताङमा राति १० बजेतिर मृत्यु भएको हो ।
उनकै छोरा अन्दाजी १८ महिनाको रेवन राई सोही अस्पतालमा उपचाररत छन् ।
गाडीमा सवार अन्य दुई जना भने सकुसल रहेका छन् ।
गाडी चालक सोही ठाउँका ४३ वर्षका प्रेम राई इलाका प्रहरी कार्यालय सोताङको नियन्त्रणमा छन् ।
