पाँचथर । पाँचथरमा जंगलमा सल्किएको आगलागीमा परी दुई जनाको मृत्यु भएको छ भने चार जना घाइते भएका छन् ।
डढेलोबाट फिदिम नगरपालिका १३ का ४७ वर्षीया उषाकला राई नेम्वाङ र कुम्मायक ३ का २२ वर्षीया प्रतिमा सम्वाहाम्फेको ज्यान गएको हो ।
बिहीबार दिउँसो दाउरा खोज्न गएकी राई फिदिम १३ को जौवारी जंगलमा सल्केको डढेलोमा फस्दा गम्भीर घाइते भएकी थिइन् ।
उनलाई काठमार्डौको बर्न अस्पताल लैजाने क्रममा बाटैमा मृत्यु भएको पारिवारिक स्रोतले जनाएको छ ।
यस्तै, कुम्मायक ३ को जंगलमा लागेको डढेलोमा फसेकी स्थानीय प्रतिमा सम्बाहाम्फेको बिहीबार राति निधन भएको थियो ।
कुम्मायक गाउँपालिका-३ ताम्राखुका अमरसिंह थापा र पदम खड्काको नीजि बनमा लागेको डढेलोमा पर्दा घाइते भएका थप दुई जनालाई उपचारका लागि विराटनगरको सिटी अस्पतालमा भर्ना गरिएको छ ।
२८ वर्षीया सपना सम्बाहाम्फे र ६० वर्षीया निरमाया सम्बाहाम्फेलाईलाई विराटनगर पुर्याइएको र अवस्था जटिल रहेको पारिवारिक स्रोतले जनाएको छ ।
आगोमा जल्दा निभाउने क्रममा कुम्मायक १ का ५५ वर्षीय धनबहादुर विश्वकर्माको पनि खुट्टा भाँचिएको छ भने कुम्मायक ३ की ११ वर्षीया सिवाना सम्वाहाम्फे घाइते छन् ।
कुम्मायकमा भएको आगलागीमा सात जना सर्वसाधारणको घर जलेको छ ।
साथै आगलागीबाट ४० लाख रुपैयाभन्दा बढी क्षति भएको जिल्ला प्रहरी कार्यालय पाँचथरका प्रहरी निरीक्षक विनालाल साह (तेली) ले जनाएका छन् ।
