मकवानपुर । मकवानपुरको कैलाश गाउँपालिका-६ मा लागुऔषध कारोबारीबाट प्रहरीको पेस्तोल लुटिएको छ ।
कैलाश गाउँपालिका ६ स्थित दुम्सीखर्क जंगलमा लागुऔषध कारोबारी रहेको सूचना पाएर सोमबार इलाका प्रहरी कार्यालय पालुङका प्रहरी हवलदार अर्जुन तामाङ र सहायक हवलदार गोविन्द मगरातीसहित त्यहाँ पुगेको थियो ।
तर, प्रहरी टोलीमाथि कुटपिट गरी उनीहरूले पेस्तोल लुटेर भागेको प्रहरीले जनाएको छ ।
जिल्ला प्रहरी कार्यालय मकवानपुरका प्रहरी उपरीक्षक विश्वराज खड्काले अफिम कारोबारीहरू त्यहाँ रहेको सूचना आएपछि गएको प्रहरी टोलीको पेस्तोल लुटिएको जानकारी दिए ।
लागुऔषध कारोबारीसहितका १०–१५ जनाको समूहले हुल-हुज्जत गरी पेस्तोल लुटेर लगेको भन्दै उनले पेस्तोल र लुटपाटमा संलग्नहरूको खोजी कार्य भइरहेको बताए ।
हवलदार तामाङ र सहायक हवलदार मग्राती लागुऔषध कारोबार भइरहेको सूचना पाएर जंगलमा गएकोमा अफिम र मोटरसाइकल छाडेर लागु औषध कारोबारी भागेका थिए ।
अफिम र मोटरसाइकल लिएर इलाका प्रहरी कार्यालयतर्फ आउँदै गर्दा ठुलो समूहमा रहेका स्थानीयले घेरा हालेर प्रहरीलाई कुटपिट गरेका थिए ।
घटना पाए लगतै जिल्ला प्रहरी कार्यालय मकवानपुरका प्रहरी नायब उपरीक्षक श्यामु अर्यालको नेतृत्वमा प्रहरी परिचालन भए पनि हतियार अझै फेला नपरेको जनाएको छ ।
प्रहरी उपरीक्षक खड्काले घटनामा संलग्न रहेको र पेस्तोल खोजी कार्य भइरहेको बताए ।
