काठमाडौं । शुक्रबार दिउँसोतिर राजसंस्था पुनर्स्थापनाको मागसहित आन्दोलनरत राजावादीहरूले प्रदर्शन चर्काइरहेका थिए ।
काठमाडौंको तीनकुनेमा जारी उक्त प्रदर्शनमा फोटो-भिडियो खिचिरहेका थिए, एभिन्युज टेलिभिजनका पत्रकार सुरेश रजक ।
तीनकुनेस्थित रोयल बैंक्वेट नजिकैको घरमा बसेर फोटो-भिडियो खिचिरहेका रजक चौथो तलामा चढे ।
प्रदर्शन चर्किँदै जाँदा रजक चढेको घरमै राजावादीले ढुंगामूढा गर्न थाले । राजावादीहरूले शुरुमा तोडफोड गरेर त्यसपछि घरमै आगो लगाएका थिए ।
सो भवनको चौथो तलामा चढेर टेलिभिजनका लागि दृष्य खिचिरहेका पत्रकार रजकको जलेर मृत्यु भयो ।
उनी एभिन्यूज टेलिभिजनका क्यामेराम्यान हुन् ।
प्रहरीसँगको झडपपछि तीनकुने क्षेत्रमा अवस्थित मार्बल हाउसमा आगजनी गरिएको थियो । त्यही उनले अकालमा ज्यान गुमाउनुपर्यो ।
एभीन्युजका पत्रकार रजक घरको छतबाट आन्दोलनको भिडियो तथा फोटो खिच्न गएको बखत अचानक घरमा आगजनी भएपछि बाहिर निस्किन नपाएको नेपाल प्रहरीका प्रवक्ता दिनेशकुमार आचार्यले जानकारी दिए ।
आगलागी भएको घरको चौथो तलामा पत्रकार रजकको शव भेटिएको आचार्यले बताए ।
रजकका भान्जा राजेशका अनुसार मामा सुरेश रजकको राजावादीले आगो लगाएको घरमा जलेर मृत्यु भएको छ । तर शव नचिनिने अवस्थामा रहेको हुँदा प्रहरीले हस्तान्तरण नगरेको उनले बताए ।
