कालीकोट । कालीकोटको रास्कोट नगरपालिकाको बडीमालिका माध्यमिक विद्यालयमा कार्यरत शिक्षक कृष्णप्रसाद बरालले फेसबुकमा नगरप्रमुख धर्मराज शाहीको प्रशंसा नगरेको भन्दै नियमविपरीत सरुवा गरेको आरोप लगाएको छ ।
नगरप्रमुख गाउँमा हिँड्दा, विद्यालयमा जाँदा भिडियो बनाएर सामाजिक सञ्जालमा पोस्ट नगरेको भन्दै शिक्षक बराललाई सरुवा गरेको पाइएको हो ।
शिक्षक बरालले आफूहरूले व्यक्तिगत प्रशंसा गर्न नसकेको र त्यसैका आधारमा दैनिक धम्क्याउने मात्र होइन, शिक्षा समितिको निर्णयविपरीत सरुवा गर्ने गरेकोप्रति आपत्ति जनाए ।
शिक्षक बरालसहित खेमराज न्यौपानेलाई पनि नगरप्रमुख शाहीले सरुवा गरेका हुन् ।
शिक्षा समितिको बैठकमा व्यक्तिगत आग्रह पूर्वाग्रहले विद्यालयमा राम्रो गरिरहेका शिक्षकद्वय बराल र न्यौपानेलाई नगरप्रमुख शाहीले शाखालाई तुरुन्त सरुवा गर्न निर्देशन दिएका हुन् ।
शिक्षकले पाउने सेवाबाट दुई हजारदेखि सात हजार रुपैयाँसम्म तलब कटौती गर्नेदेखि माओवादी आस्थाभन्दा फरक आस्था राख्ने शिक्षकमाथि अन्याय भइरहेको अन्य कर्मचारी बताउँछन् ।
शिक्षक बराललाई यसअघि मोतीराम माध्यमिक विद्यालयको प्रअबाट सरुवा गरेर उक्त ठाउँमा माओवादी आस्थावान् अमरनाथ योगीलाई प्रअको जिम्मेवारी दिइएको थियो ।
कालाशिला माध्यमिक विद्यालयका प्रधानाध्यापक आशा केसी धमलालाई हटाइएको छ ।
बडीमालिका माध्यमिक विद्यालयलाई जिल्लाकै नमुना बनाउने प्रअ पुष्पराज बराललाई समेत सरुवा गर्ने नगरप्रमुखको योजना थियो ।
उनलाई सरुवा गरेर अरूलाई ल्याउँदा विद्यालयका सबै उपलब्धि गुम्ने भनी उनकै पार्टी माओवादीका नेताले सुझाव दिएपछि बराललाई यथावत् राखिएको जनाइएको छ ।
शिक्षा ऐन र स्थानीय सरकार सञ्चालन ऐन, २०७४ ले गाउँ शिक्षा समितिलाई सरुवाको अधिकार दिएको छैन ।
अति आवश्यक परेमा सिफारिस गर्ने मात्र अधिकार छ तर अन्तिम निर्णय दिने अधिकार प्रदेशका शिक्षा विकास निर्देशनालय तथा शिक्षा समन्वय एकाइको हो ।
रास्कोट नगरपालिकाका प्रमुख शाहीले यसअघि पनि शिक्षकलाई जथाभाबी सरुवा गर्दै आफ्नो पार्टीमा आस्था राख्ने सबै शिक्षकलाई जिम्मेवारी दिए ।
नगरप्रमुख शाहीको निर्देशनमा गरिएको समितिको निर्णयविरुद्ध उच्च अदालतमा मुद्दासमेत परेको छ ।
तर मुद्दा अगाडि नबढाउन निवेदक पक्षलाई सहमति गर्ने आश्वासन दिए पनि सरुवा बदर गर्न भने नगरप्रमुख शाहीले मानेनन् ।
शिक्षक सरुवा गर्दा करारलाई मात्र गर्ने अधिकार गाउँ शिक्षा समिति अर्थात् नगर शिक्षाको हो तर रास्कोटमा मनलाग्दी चलिरहेको छ ।
यता शिक्षा शाखा प्रमुख खेमराज शाहीले आफूलाई सरुवा गर्ने निर्देशन आएकाले गरेको र किन के कारण भन्ने कुरा नगरप्रमुखलाई नै जानकारी हुने बताए ।
