बनियानी । सशस्त्र प्रहरी बलले एक हजार ६ सय ३६ किलो गाँजासहित झापाबाट दुईजनालाई पक्राउ गरेको छ ।
प्रहरीले सो परिमाणको गाँजासहित बुद्धशान्ति गाउँपालिका–४ मेची राजमार्गबाट दुई ट्रकसहित दुवैजनालाई नियन्त्रणमा लिएको हो ।
इलामबाट झापातर्फ आउँदै गरेको को १ ख ५००१ र प्र १–०२–००२ ख ०५८४ नम्बरको ट्रकबाट सशस्त्र प्रहरी बलको टोलीले शुक्रबार उनीहरूलाई नियन्त्रणमा लिएको थियो ।
एक हजार ६ सय ३६ किलो गाँजा नियन्त्रणमा लिइएको सशस्त्र प्रहरी बल नेपाल नं. १ बराह बाहिनीका सशस्त्र प्रहरी उपरीक्षक विक्रम हुमागाईँले जानकारी दिए ।
उनका अनुसार पक्राउ पर्नेमा धनकुटाको शहिदभूमि नगरपालिका–४ का महेश राई र इलामको माईजोगाई गाउँपालिका–२ का गंगाबहादुर बस्नेत रहेका छन् ।
भारततर्फ निकासी गर्ने योजनाका साथ हिँडेको ट्रक प्रहरीले जाँच गर्दा ट्रकमा ५७ बोरामा राखेर ल्याइएको गाँजा फेला परेको थियो ।
प्रहरीले उनीहरुको साथबाट रू ८७ हजार र पाँच थान मोबाइल समेत बरामद गरेको छ ।
उनीहरुलाई ट्रकसहित आवश्यक कारबाहीका लागि जिल्ला प्रहरी कार्यालय झापामा बुझाइएको छ ।
