विराटनगर । विराटनगर महानगरपालिका–९ ट्राफिक चोकमा ‘द मोक्स डिजाइनर यार्ड’ सञ्चालनमा आएको छ । विराटनगर–१२ का २६ वर्षीय देवानन्द अधिकारीले स्वदेशमा नै केही गर्नुपर्छ भन्ने उद्देश्यले २० लाखको लगानीमा डिजाइनर यार्ड सञ्चालनमा ल्याएका हुन् ।
मिस्टर इन्टरनेसनल नेपाल–२०१८ का र म्यानहन्ट इन्टरनेसनल नेपाल २०१७ का सेकेन्ड रनरअप साजिद आलमलगायतले शुक्रबार उक्त यार्डको उद्घाटन गरे ।
भारतको पञ्जाव टेक्नोलोजी युनिभर्सिटी चण्डिगढबाट ‘फेसन डिजाइन’ मा ब्याचलर गरेका अधिकारीले ग्राहकको आकांक्षालाई मध्यनजर गर्दै यसको सुरुवात गरेको बताए । महिला, पुरुष तथा बालबालिकालाई प्राथमिकता दिएर फेसन डिजाइन गरिने उनको भनाइ छ ।
ग्राहकको चाहनाअनुसार सहुलियतमा गुणस्तरीय सामग्री उपलब्ध गराउने अधिकारीले बताए । ग्राहकहरूको लागि अनलाइन डेलिभरी सेवा उपलब्ध गराउने गरि तयारी भइरहेको उनको भनाइ थियो । भारतको सिलिगुडी र कोलकातामा पाइने पहिरनहरू अब विराटनगरमै पाइने दाबी सञ्चालक अधिकारीको छ ।
अधिकारीसँगै अध्ययन गरेका चन्दिगढका डिजाइनर जगदीप सिंह पनि उनीसँगै छन् । सिंहले ग्राहकले खोजेको डिजाइन तयार पारेर गुणस्तरीय सामग्री उपलब्ध गराउन आफूहरू तयार रहेको बताउँदै डिजाइजर सिंहले ग्राहकको रुचिअनुसार सस्तोदेखि महँगोसम्मका पहिरन बनाउने बताए ।
