विराटनगर । कोशी प्रदेशमा होलीको दिन विभिन्न स्थानमा भएका सवारी दुर्घटनामा तीन जनाको मृत्यु भएको छ भने ३० जना घाइते भएका छन् ।
कोशी प्रदेशका पहाडी तथा हिमाली जिल्लाहरूमा रङहरूको पर्व होली मनाइरहँदा यी दुर्घटनाहरू भएका हुन् ।
नेपाल प्रहरी राजमार्ग सुरक्षा तथा ट्राफिक व्यवस्थापन कार्यालय इटहरी सुनसरीका अनुसार होली पर्वको दिन प्रदेशभरि जम्मा १८ वटा दुर्घटना भएका छन् ।
भोजपुर जिल्लाको आमचोक गाउँपालिका-६ थापाचोकस्थित घोडेटार बालंखा कच्ची सडकखण्डमा ट्र्याक्टरबाट लडेर एक जनाको मृत्यु भएको छ ।
पुर्णे बजारबाट बासिखोरा तर्फ जाँदै गरेको प्रदेश नं.१-०२-००३ त.१३४३ नम्बरको ट्याक्टरबाट लडेर एक युवकको मृत्यु भएको छ ।
बिहीबार साँझ ४ः४५ बजेतिर भएको उक्त दुर्घटनामा आमचोक गाउँपालिका-७ निवासी अन्दाजी २१/२२ वर्षीय निसान राईको मृत्यु भएको हो ।
ट्याक्टरको ट्रलीबाट अचानक लड्दा ट्याक्टरको पछाडिको चक्काले किचेर उनको घटनास्थलमै मृत्यु भएको हो ।
ट्याक्टर चालक संखुवासभा जिल्लाको चैनपुर नगरपालिका-७ निवासी २५ वर्षीय ओङ्दि शेर्पा इलाका प्रहरी कार्यालय बोयाङको नियन्त्रणमा रहेका छन् ।
यसैगरी, उदयपुरको त्रियुगा नगरपालिका-८ स्थित सरस्वती पुलनजिकै मदन भण्डारी लोकमार्गमा रोकिराखेको ट्र्याक्टरमा तीव्र गतिको मोटरसाइकल ठोक्किँदा एक जनाको मृत्यु भएको छ ।
बिहीबार राति ९ः३० बजेतिर भएको उक्त दुर्घटनामा मोटरसाइकल चालक उदयपुर जिल्लाको त्रियुगा नगरपालिका-७ भान्टावारी निवासी अन्दाजी ३४ वर्षीय भुवन राईको मृत्यु भएको हो ।
गाईघाटबाट चुहाडेतर्फ फर्की रोकिराखेको प्रदेश २-०१-००१त २३०१ नम्बरको ट्याक्टरलाई सोही दिशातर्फ जाँदै गरेको बा.६४ प ५१७ नम्बरको १२५ सिसी क्षमताको मोटरसाइकलले पछाडिबाट ठक्कर दिएको थियो ।
दुर्घटनामा राई गम्भीर घाइते भएका थिए । उपचारका लागि जिल्ला अस्पताल उदयपुरमा लगिएकोमा चेकजाँच गर्दा उनको मृत्यु भइसकेको अस्पतालका डाक्टरले घोषणा गरेका थिए ।
ट्याक्टर चालक उदयपुर जिल्लाको उदयपुरगढी गाउँपालिका-६ निवासी अन्दाजी २८ वर्षीय कुल बहादुर मगरलाई जिल्ला प्रहरी कार्यालय उदयपुरको नियन्त्रणमा लिइएको छ ।
यस्तै, सुनसरीको हरिनगर गाउँपालिका-४ स्थित हुलाकी राजमार्गमा भएको ट्याक्टर दुर्घटनामा एक पैदल यात्रीको मृत्यु भएको छ ।
बिहीबार अन्दाजी १३:०० बजेको समयमा हरिनगर गाउँपालिका-४ कार्यालय अगाडि हुलाकी राजमार्गमा इनरुवाबाट हरिनगरतर्फ आउँदै गरेको प्र २-०१-००१ त २४७१ नम्बरको ट्याक्टरले पैदल यात्री हरिनगर गाउँपालिका-४ निवासी ३५ वर्षीय उमेश महतोलाई ठक्कर दिएको थियो ।
दुर्घटनामा गम्भीर घाइते भएका महतोलाई तत्काल उपचारका लागि जिल्ला अस्पताल सुनसरी इनरुवा लगिएकोमा अस्पताल पुर्याउनासाथ उनको मृत्यु भएको थियो । मृतकको शव थप परीक्षणका लागि घोपा अस्पताल धरान पठाइएको छ ।
दुर्घटनामा संलग्न ट्याक्टर इलाका प्रहरी कार्यालय हरिनगर सुनसरीको नियन्त्रणमा रहेको छ ।
ट्याक्टर चालक सप्तरी जिल्लाको कन्चनपुर नगरपालिका-४ निवासी अन्दाजी ३४ वर्षीय रुपेश सरदारलाई जिल्ला प्रहरी कार्यालय सुनसरीले नियन्त्रणमा लिएको छ ।
यसैगरी, सुनसरी जिल्लामा अरू आठ वटा दुर्घटना भएका छन् भने मोरङमा चार वटा दुर्घटना भएका छन् ।
अधिकांश दुर्घटनाहरू सवारी चालकको लापरवाही, तीव्र गति र मादक पदार्थ सेवन गरेर सवारी चलाउने प्रवृत्तिका कारण भएको प्रहरीको प्रारम्भिक अनुसन्धानले देखाएको छ ।
