विराटनगर । फागुन शुक्ल पूर्णिमाका दिन परम्परागत रूपमा हर्षोल्लासका साथ मनाइने फागु अर्थात् होली पर्वको रौनक आज पहाडी तथा हिमाली जिल्लाहरूमा छ ।
वसन्त ऋतुको आगमनसँगै आउने यो पर्व आज पहाडी र हिमाली जिल्लाहरूमा मनाइए पनि तराईका केही स्थानमा पनि मनाइएको छ ।
कोशी प्रदेशको राजधानी विराटनगरमा पनि आजै होलीको रौनक देखिएको थियो । अनुहारमा विभिन्न प्रकारका रङ लगाएर बाटोमा हिँडिरहेको र होलीका लागि चाहिने सामग्री किन-बेच गरिरहेको देख्न सकिन्छ ।
यसबीचमा विराटनगरको सेन्ट्रल मलले सुरक्षाको दृष्टिकोणलाई मध्येनजर गरेर होलीको अवसरमा अनुहारमा रङ लगाएका ग्राहकहरूलाई प्रवेश गर्न निषेध गरेको छ ।
मलका सुरक्षा गार्डहरूले बिहीबार साँझतिर नचिनिने गरी अनुहारमा रङ लगाएर आएका ग्राहकहरूलाई रोकेका हुन् ।
सुरक्षा गार्डहरूले अनुहारको रङ पुछेर मात्र मल प्रवेश गर्न अनुमति दिइरहेका छन् । यस निर्णयपछि ग्राहकहरूको मिश्रित प्रतिक्रिया देखिएको छ ।
केही ग्राहकहरूले बिना कुनै झन्झट रङ पुछेका छन् भने अन्य केहीले भने यस निर्णयप्रति असन्तुष्टि व्यक्त गरेका छन् ।
“चाडपर्वअनुसार रङ दलेरै जाँदा पनि केही नहुने” भन्दै केही ग्राहकहरूले सुरक्षा गार्डहरूसँग बहस गरिरहेको पनि देखिएको थियो ।
मलका व्यवस्थापकका अनुसार यो निर्णय सुरक्षाको कारणले गरिएको हो, जसले गर्दा सबै ग्राहकहरूको पहिचान स्पष्ट हुन सकोस् ।
सिसिटिभी फुटेजमा ग्राहकहरूको अनुहार स्पष्ट नदेखिने भएकाले कुनै अप्रिय घटेमा पहिचान तथा अनुसन्धानका लागि सहज हुने मलका सुरक्षा गार्डहरूको भनाइ छ ।
