खोटाङ । खोटाङको दिक्तेल रुपाकोट मझुवागढी नगरपालिका-७ रुवाबुस्थित दिक्तेल दोर्पा भित्री कच्ची सडकखण्डमा ट्र्याक्टर दुर्घटना भएको छ ।
बुधबार बिहान १० बजेतिर चिउरीडाडाबाट दिक्तेलतर्फ ढुंगा बोकी आउँदै गरेको को २ त ७९८४ नम्बरको ट्र्याक्टर ब्रेक फेल हुँदा सडकबाट अन्दाजी ५०० मिटर तल खसेको हो ।
दुर्घटनामा ट्र्याक्टर चालक जिल्ला खोटाङ दिक्तेल रुपाकोट मझुवागढी नगरपालिका-७ वालिङ निवासी २६ वर्षीय नविन गुरुङ सामान्य घाइते भएका छन् ।
ट्र्याक्टरका सहचालक सोही ठाउँका ३१ वर्षीय विरेन्द्र राईको भने निधार र दाहिने खुट्टामा गम्भीर चोट लागेको छ ।
घाइतेहरूलाई तत्काल उपचारको लागि जिल्ला अस्पताल खोटाङ पठाइएको छ ।
जिल्ला ट्राफिक प्रहरी कार्यालय खोटाङबाट अन्दाजी १२ किलोमिटर उत्तरमा भएको यस दुर्घटनाको कारण ब्रेक फेल भएको प्रारम्भिक अनुसन्धानबाट खुलेको छ ।
चालकले सवारी चालक अनुमति पत्र प्राप्त गरेको र दुर्घटनाको समयमा मादक पदार्थ सेवन गरेको शंका नरहेको प्रहरीले जनाएको छ ।
