विराटनगर । सुनसरीको बर्जु गाउँपालिका वडा नं. २ रायटोल स्थित भित्री पक्की सडकमा मंगलबार दिउँसो १२:१० बजे एक भारतीय नम्बर प्लेटको मोटरसाइकलले ठक्कर दिँदा ४ वर्षीय बालक गम्भीर घाइते भएका छन् ।
प्रहरीका अनुसार उत्तरबाट दक्षिणतर्फ जाँदै गरेको BR38J 4783 नम्बरको १२५ सिसि क्षमताको भारतीय मोटरसाइकलले सडकमा खेल्दै गरेका स्थानीय निवासी नरेश रायका ४ वर्षीय छोरा आरुष रायलाई ठक्कर दिएको थियो ।
दुर्घटनामा बालकको अनुहार र दाहिने हातमा गम्भीर चोट लागेको छ । घाइते बालकलाई तत्काल उपचारका लागि विराट नर्सिङ होम, विराटनगर पठाइएको छ ।
दुर्घटना पश्चात मोटरसाइकल र चालक भारत अररिया जिल्ला, पिपरा गाउँ पञ्चायत, दम्मदिघी वडा नं. ३ निवासी ३० वर्षीय सुनिल मण्डललाई इलाका प्रहरी कार्यालय सितागंजले नियन्त्रणमा लिएको छ ।
प्रहरीका अनुसार दुर्घटनाको कारण मोटरसाइकलको तीव्र गति रहेको प्रारम्भिक अनुसन्धानबाट खुलेको छ ।
उक्त दुर्घटना स्थल ट्राफिक प्रहरी पोष्ट दुहबी र सितागंजबाट करिब १७ किलोमिटर दक्षिणमा पर्दछ ।
