विराटनगर । विराटनगर भन्सार कार्यालयमा मालवस्तु बोकेर भारतबाट आएका दुई वटा मालवाहक ट्रकको एउटै नम्बर भेटिएको छ ।
भन्सार कार्यालयमा मालवस्तु जाँचपास गराएर उद्योगमा अनलोड गरेर फर्कँदै गरेको र मालवस्तु बोकेर जाँचपासका लागि पार्किङमा रोकिएको गाडीको नम्बर प्लेट एउटै भेटिएको हो ।
एउटै नम्बर प्लेटका दुई ट्रक भेटिएपछि नियन्त्रणमा लिएर अनुसन्धान सुरु गरिएको विराटनगर भन्सार कार्यालयका प्रमुख उमेश श्रेष्ठले जानकारी दिए ।
राजस्व छलीको सम्भावना देखिएपछि भारतीय नम्बर प्लेट आरजे १४ जिएच ०४३३६ नम्बरका दुई गाडी नियन्त्रणमा लिएर अनुसन्धान थालिएको हो ।
उद्योगबाट सामान अनलोड गरेर भन्सार प्रवेशमा इन्ट्री गराउने र भारतीय भन्सार परिसरबाट नेपालको भन्सार परिसरमा सामान बोकेर आउने ट्रकको समय एउटै परेपछि आशंका उब्जिएको छ ।
भारततर्फ फर्कंदै गरेको ट्रकको सामान भन्सार जाँचपासपछि नै अनलोड गरेर फर्किएको हो तर पार्किङमा भएको ट्रक भने भन्सार जाँचपास हुन बाँकी रहेको थियो ।
यस्तो अवस्थामा पहिलो ट्रकको सामानको प्रज्ञापनपत्र दुरुपयोग गरेर दोस्रो ट्रक भन्सारबाट निकाल्न सक्ने सम्भावना धेरै हुन्छ ।
दुवै ट्रकमा कटहरी गाउँपालिकास्थित काबरा ग्रुपले सञ्चालन गर्दै आएको क्वालिटी केम प्रालिको सामान रहेको पाइएको छ ।
यता, काबरा ग्रुपका विपिन काबराले कसरी त्यस्तो भयो भन्ने आफूलाई पनि यकिन नभएको बताए । एउटा खाली र अर्कोमा सामान छ भन्ने सुन्नमा आए भए पनि थप विषय बुझ्नै बाँकी रहेको उनको भनाइ छ ।
