विराटनगर । अन्तर्राष्ट्रिय नारी दिवसको अवसरमा विराटनगरमा आयोजित ‘बिजनेस आइडिया कन्टेस्ट’ मेरिल्यान्ड कलेजका विद्यार्थीहरूले प्रथम स्थान हासिल गरेका छन् ।
नेप्लिस इन्ट्रिप्रेन्युअर्स फोरम विराटनगर च्याप्टरद्वारा शनिबार उद्योग संगठन मोरङमा आयोजित प्रतियोगितामा मेरिल्यान्ड कलेज पहिलो बनेको हो ।
मेरिल्यान्डका बिबिएस तेस्रो वर्षका सुमन झाखड, द्रक्षा प्रविन र भारती मण्डलको समूहले प्रथम स्थान हासिल गर्न सफल भएका हुन् ।
विजेता टिमले नेपालमै नयाँ अवधारणा ‘हेल्प एट होम’ प्रस्तुत गरेको थियो ।
समाज र परिवार, जागिर र व्यवसायमा व्यस्त हुँदा घरकाज गर्न घरायसी महिला कामदारको आवश्यकता पूरा गर्न उक्त कम्पनीको अवधारणा ल्याएको प्रस्तुतकर्ता द्रक्षा प्रविनले बताइन् ।
विराटनगरका स्नातक तहका छात्राहरू मात्र सामेल गराउने उद्देश्यले आयोजना गरिएको यस प्रतियोगितामा विराटनगरका एक दर्जनभन्दा बढी कलेजका विद्यार्थीहरूको सहभागिता रहेको थियो ।
विजेता टिमलाई प्रथम पुरस्कार स्वरूप नगद रु २५ हजार, ट्रफी र प्रमाणपत्र प्रदान गरिएको थियो ।
प्रतियोगितामा मुक्तना चकलेट फ्याक्ट्रीकी निर्देशक अङ्किता गिरी, अर्किड सेलुन एण्ड एकेडेमीकी निर्देशक रतिम प्याकुरेल, तनिष बुटिककी विनिशा कटेल र भ्यालेन्टाइन्स बेकरी क्याफेकी निर्देशक दिना श्रेष्ठ जजको रूपमा रहेका थिए ।
मेरिल्यान्ड कलेजका प्रिन्सिपल लक्ष्मण ढकालले आन्तरिक रूपमा पनि विद्यार्थीहरू बीच विभिन्न प्रतियोगिता समय-समयमा गराउनुले विद्यार्थीहरू सक्षम हुन सकेको बताए ।
व्यवस्थापन शिक्षामा अब्बल शैक्षिक संस्थाको रूपमा परिचित मेरिल्यान्ड कलेजले आउँदो शैक्षिक सत्रदेखि विज्ञान संकाय पनि सञ्चालन गर्ने जनाएको छ ।
