विराटनगर । मोरङको विराटनगर महानगरपालिका-३ दूध फारममा कारको ठक्करबाट एक जना गम्भीर घाइते भएका छन् ।
शुक्रबार राति ११:५५ बजे कोशी राजमार्गमा प्रहरी चौकी बरगाछी मोरङबाट खटिएको प्रहरी सहायक निरीक्षक भोला वाग्लेको गस्ती टोलीले सडकमा घाइते व्यक्तिलाई सडकमा फेला पारेको थियो ।
तत्काल उपचारका लागि नोबेल अस्पताल विराटनगर पठाइएको थियो ।
पछि, प्रहरीले घाइते विराटनगर-४ बस्ने २४ वर्षीया किसान राजवंशी रहेको पत्ता लगाएको थियो ।
उनको आफन्तसमेत सम्पर्कमा आइसकेको प्रहरीले जानकारी दिएको छ ।
साथै उनलाई को १ च ७११८ नम्बरको कारले ठक्कर दिई घाइते बनाएको अनुसन्धानबाट खुल्न आएको प्रहरीले जनाएको छ ।
प्रहरीले कार र चालक विराटनगर-४ बस्ने ५४ वर्षीया पुष्प सुनुवारलाई शनिबार ५:३० बजे नियन्त्रणमा लिएको छ ।
उनलाई जिल्ला प्रहरी कार्यालय मोरङमा ल्याई थप अनुसन्धान कार्य भइरहेको प्रहरीले जनाएको छ ।
पैदल यात्रीले मादक पदार्थ सेवन गरेको कारण दुर्घटना भएको प्रहरीको प्रारम्भिक अनुसन्धानले औंल्याएको छ ।
