विराटनगर । गत माघ २१ गते मोरङको उर्लाबारी नगरपालिकाबाट हराएका मोबाइल छिमेकी मुलुक भारतका विभिन्न स्थानमा भेटिएका छन् ।
कोशी प्रदेश प्रहरी कार्यालयको प्रादेशिक अनुसन्धान समूह तथा जिल्ला प्रहरी कार्यालय मोरङ, इलाका प्रहरी कार्यालय पथरी र इलाका प्रहरी कार्यालय उर्लाबारीबाट संयुक्त रूपमा परिचालन भएको प्रहरी टोलीले ३२ थान मोबाइल फेला पारेको हो ।
चोरी भएको मोबाइल खोजतलासको क्रममा विभिन्न कम्पनीका ३२ थान मोबाइल बरामद भएको प्रहरीले जनाएको छ ।
माघ २१ गते मोरङको उर्लाबारी नगरपालिका-५ स्थित योगराज कार्कीको मोबाइल वर्ल्ड पसलको सटर तोडफोड गरी चोरी भएको मोबाइलहरू खोजतलासको क्रममा परिचालन भएको प्रहरी टोलीले भारतीय प्रहरीसँगको सहकार्यमा भारतका विभिन्न स्थानहरूबाट फेला पारेको हो ।
उर्लाबारीमा चोरी भएको २० थान, नवलपरासीमा चोरी भएको ११ थान र दमकमा चोरी भएको १ थान मोबाइल बरामद गरिको प्रहरीले जनाएको छ ।
मोबाइल चोरीको घटना सम्बन्धमा अन्य थप अनुसन्धान तथा चोरीमा संलग्न व्यक्तिहरूको खोजतलास कार्य भइरहेको प्रहरीले जानकारी दिएको छ ।
