विराटनगर । विराटनगर महानगरपालिका-१० मा अवस्थित कान्तिपुर स्कुलको १० औं वार्षिकोत्सव शुक्रबारबाट सुरु भएको छ ।
आगामी तीन दिनसम्म हुने वार्षिकोत्सव तथा अभिभावक दिवसको आज औपचारिक कार्यक्रम गरी थालनी भएको हो ।
कार्यक्रमको उद्घाटन विराटनगर महानगरपालिका प्रमुख नागेश कोइरालाले गरेका थिए ।
त्यसअघि स्कुलको प्रवेशद्वारदेखि नै पञ्चकन्या र विभिन्न पारम्पारिक भेषभुषामा सजिएका छात्रछात्रा अनि स्काउटका विद्यार्थीहरूले आगन्तुकहरूलाई स्वागत गरेका थिए ।
कार्यक्रमलाई सम्बोधन गर्दै मेयर कोइरालाले रोजगारमुखी शिक्षा प्रदान गरेर दक्ष जनशक्ति उत्पादन गर्नुपर्नेमा जोड दिए ।
विराटनगरलाई शिक्षाको हब बनाइ राख्नका लागि युग सुहाउँदो गुणस्तरीय शिक्षाका लागि विद्यालय र कलेजहरू ध्यान पुग्नु अपरिहार्य रहेको कोइरालाको भनाइ छ ।
पछिल्लो समय केही अतिरिक्त क्रियाकलाप भइरहेको भए पनि शिक्षण विधि परम्परागत नै रहेकोले समय सुहाउँदो सुधार गर्ने धारणा उनको छ ।
विराटनगरका सामुदायिक विद्यालयका विद्यार्थीहरूलाई व्यवसायिक सीपमूलक तालिम दिएर सीपयुक्त बनाउने अभियान विराटनगर महानगरले सुरु गर्ने तयारी गरेको बताउँदै उनले त्यसका लागि प्रधानमन्त्री र शिक्षा मन्त्रीसँग संवाद गरिसकेको पनि सुनाए ।
यता, कार्यक्रममा बोल्दै स्कुलका प्रिन्सिपल भेषराज नेपाल ‘भुवन’ ले सक्षम नेतृत्व, कुशल व्यवस्थापन र मेहनति प्रध्यापक, शिक्षक-शिक्षिकाहरूका कारण कान्तिपुर स्कुल सधैं अगाडि रहेको बताए ।
कान्तिपुर एजुकेसनल फाउन्डेसन प्रालिले १० वर्षअघि १६२ जना विद्यार्थीबाट सुरु गरेको कान्तिपुरमा हाल करिब तीन हजार बढी विद्यार्थी संख्या पुगेको प्रिन्सिपल नेपालले बताए ।
समयसापेक्षित शैक्षिक गुणस्तरमा सुधारका साथै विद्यार्थी र शिक्षकको मिहिनेत र अभिभावकको मायाले फाउण्डेसनले अहिलेको सफलता प्राप्त गरेको उनको भनाइ छ ।
अघिल्लो वर्षको हिसान क्रिकेटको विजेता हुनु र हिसान पुरुष भलिबलतर्फ उपविजेता हुनुले पनि स्कुलले अतिरिक्त क्रियाकलापमा कान्तिपुर अब्बल रहेको साबित हुने प्रिन्सिपल नेपाल बताउँछन् ।
स्वागत मन्तब्य राख्दै स्कुलका भाइस प्रिन्सिपल देवीलाल महतोले विद्यार्थीहरूलाई सीप र संस्कारसहितको गुणस्तरीय शिक्षा प्रदान गरेर विद्यालय अगाडि बढेको बताए ।
उद्घाटन कार्यक्रममा विराटनगर-१० का वडाध्यक्ष अर्जुन गिरी, शिक्षा विकास समन्वय इकाई प्रमुख जीवन गड्तौला, शिक्षक-शिक्षिका र अभिभावकहरूको उपस्थिति रहेको थियो ।
कार्यक्रमको पहिलो दिन बालकक्षादेखि ३ सम्मका विद्यार्थीहरूले सांस्कृतिक नृत्य, गीत प्रस्तुत गरेका थिए ।
शनिबार कक्षा ४ देखि १० कक्षासम्मका विद्यार्थीहरूले आ–आफ्नो प्रतिभा प्रस्तुत गर्ने बताइएको छ ।
आइतबार भने ११ र १२ कक्षामा अध्ययनरत विद्यार्थीहरूको लागि विशेष कार्यक्रमसहित तीन दिने कार्यक्रम गरी स्कुलले १०औं वार्षिकोत्सव तथा अभिभावक दिवस मनाइरहेको हो ।
