उदयपुर । उदयपुरमा पिकअपले ठक्कर दिँदा घरअगाडि बसेर चटपटे खाइरहेका दिदी-बिहिनीको मृत्यु भएको छ ।
मृत्यु हुनेमा जिल्ला सप्तरी पटेर्वा घर भइ हाल जिल्ला उदयपुर त्रियुगा नगरपालिका-१२ दुर्गा टोल बस्दै आएको ललन दासको १४ वर्षीया छोरी अनुकुमारी र १२ वर्षीया देवीकुमारी रहेका छन् ।
उदयपुरको त्रियुगा नगरपालिका-३ हात्तीमारास्थित भित्री सडकखण्डमा डिमगेटबाट त्रियुगा बसपार्कतर्फ जाँदै गरेको प्र १-०५-००१ च ००९२ नम्बरको पिकअप भेनले उनीहरूलाई ठक्कर दिएको थियो ।
बिहीबार साँझ ७ः३० बजेतिर घर अगाडि सडकपेटीमा बसेर चटपटे खाइरहेका उनीहरूलाई एक्कासि पिकअप भेनले ठक्कर दिँदा अनुकुमारी दासको अनुहार, नाक र मुखबाट ब्लड आइ जिल्ला अस्पताल उदयपुर पठाइएको थियो ।
उनलाई उपचारको क्रममा साँझ ७:२५ बजे डाक्टरले मृत घोषणा गरेका थिए । उनकी बहिनी १२ वर्षीया देवीकुमारी दासको भने घटनास्थल मै मृत्यु भएको थियो ।
प्रहरीले चालक उदयपुर त्रियुगा नगरपालिका-९ बस्ने १८ वर्षीया निरजल कटुवाललाई नियन्त्रणमा लिएको छ ।
