विराटनगर । मोरङको ग्रामथान गाउँपालिका-२ झोराहाटमा रहेको जनक मेमोरियल सेकेन्डरी बोर्डिङ स्कुलले अभिभावक नृत्य प्रतियोगिता आयोजना गरेको छ ।
स्कुल प्रांगणमा मंगलबार आयोजित उक्त प्रतियोगितामा १५ जना अभिभावकले प्रतिस्पर्धा गरेका थिए ।
जसमा अरू १४ जनालाई उच्छिन्दै सत्यनारायण माझी प्रथम भए भने राधा घिमिरे द्वितीय र पुजन विष्टले तेस्रो स्थान हासिल गरे ।
उनीहरूलाई स्कुलका प्रिन्सिपल सुनील भगत र कोअर्डिनेटर ज्योतिप्रसाद धितालले प्रमाणपत्रसहित पुरस्कृत गरे ।
विद्यालयले अभिभावकका साथै विद्यार्थीहरूबीच पनि ‘डान्स ब्याटल’ नामक प्रतियोगिता आयोजना गरेको थियो ।
३०० जना विद्यार्थीबीच भएको प्रतिस्पर्धाबाट ३० जना फाइनलका लागि चयन भएको स्कुलका भाइस प्रिन्सिपल समुन्द्र पराजुलीले जानकारी दिए ।
कार्यक्रममा संस्थाप्क करण माझी, व्यवस्थापक सुखाराम माझी, आलोक अधिकारी, संस्थापक सुरेन्द्र भगत, वीरेन्द्र चौधरी, नित्यानन्द शाह, यमन सरदारलगायत शिक्षक–शिक्षिका र विद्यार्थीहरूको उपस्थिति रहेको थियो ।
विगत ३३ वर्षदेखि ग्रामथानको शिक्षा क्षेत्रमा निरन्तर योगदान दिन सफल भएको जनक पालिकाभरि नै उत्कृष्ट नतिजा ल्याउन सफल छ ।
त्यसका अलाबा पठनपाठनसँगै अतिरिक्त क्रियाकलापमा पनि आफूलाई साबित गराउँदै आएको जनकमा हाल एक हजारभन्दा बढी विद्यार्थी अध्ययनरत छन् ।
