दुहबी । सुनसरी-मोरङलाई सीमा बनाएर बग्ने बुढीखोलामा कटान नियन्त्रण गर्न तटबन्ध बनाउने काम थालिएको छ ।
बुढीखोलामा बर्सेनि आउने बाढीले कटान गरी जनधनको क्षति पुर्याएपछि उक्त स्थानमा थप क्षती नहोस् भनी तटबन्ध निर्माणको कार्य सुरु भएको हो ।
दुहबी ६ को कालीमन्दिर दक्षिणपूर्वतर्फको कटानले क्षति पुर्याएको स्थानमा तारजालीको कार्य विधिवत रूपमा दुहबी नगर प्रमुख वेदनारायण गच्चादारले शुभारम्भ गरेका छन् ।
दुहबी ४ र दुहबी ६ मा बुढीखोला अभिसाप बन्दा बर्सेनि कटानले ठुलो जनधनको क्षति ब्यहोर्नु परेको छ ।
उक्त क्षेत्रमा तटबन्ध निर्माणका लागि नगर प्रमुख गच्छादारले सिंचाइ विभाग र सम्बन्धित मन्त्रालयसँग पटकपटक सहयोग मागर्दै आएका थिए ।
पहिलो चरणका लागि १५ लाख बजेट प्राप्त भएपछि तारजालिको कार्य सुरु गरिएको छ भने क्रमश: बजेट आउँदै जाने र सोही रूपमा काम अगाडि बढाउदै लैजाने नगर प्रमुख गच्छादारले जनाएका छन् ।
उद्घाटन कार्यक्रममा दुहबी ६ का अध्यक्ष घनश्याम हलुवाइ, कार्यपालिका सदस्य जयब्रत सरकारलगायत स्थानीयको सहभागिता रहेको थियो ।
