विराटनगर । कोशी प्रदेशसभाका सभामुख अम्बरबहादुर विष्टले प्रथम कोशी प्रदेश खेलकुद महोत्सव – २०८१ को उद्घाटन गरेका छन् ।
विराटनगरस्थित सहिद रंगशालाको मैदानमा मंगलबार सभामुख विष्टले महोत्सवको उद्घाटन गरे ।
महोत्सव आजबाट फागुन १८ गतेसम्म सञ्चालन हुने छ ।
महोत्सवको उद्घाटन गर्दै सभामुख विष्टले खेलकुद क्षेत्रलाई प्रोत्साहन गर्न विद्यालयस्तरबाटै खेलकुदलाई पाठ्यक्रममा समावेश गरेर लग्न सुझाव दिए ।
विष्टले खेलकुद सम्भावनायुक्त क्षेत्र रहेको भन्दै निरन्तरको खेलकुद गतिविधिले खेलाडी उत्पादनमा महत्वपूर्ण भूमिका खेल्ने धारणा व्यक्त गरे ।
उद्घाटन समारोहमा बोल्दै कोशी प्रदेशका सामाजिक विकास मन्त्री तथा कोशी प्रदेश खेलकुद विकास बोर्डका अध्यक्ष पाँचकर्ण राईले खेलकुद महोत्सवलाई आगामी आर्थिक वर्षमा निरन्तरता दिने बताए ।
राईले प्रदेश स्तरीय खेलकुद प्रतियोगिताले राष्ट्रिय तथा अन्तर्राष्ट्रिय खेलकुद प्रतियोगितामा पदक जित्नसमेत सहयोग पुर्याउने जानकारी दिए ।
कोशी प्रदेश खेलकुद विकास बोर्डका सदस्य सचिव कृष्ण बस्नेत (पर्शुराम ) ले बोर्डले ‘खेल गतिनै खेलाडीको प्रगति’ हो भन्ने मान्यतासाथ प्रतियोगिता आयोजना गरेको प्रष्ट पारे ।
बस्नेतले बोर्डले खेल महोत्सवको निरन्तरताका लागि आवश्यक सबै पहल गर्ने धारणा पर्ने व्यक्त गरे ।
उनले नियमितको खेल गतिविधिले खेलाडीको प्रतिभामा निखार ल्याउने बताउँदै खेलाडीलाई खेल खेलेरै जीवनयापन गर्ने अवस्था सिर्जना गर्न सबै पक्ष एक ढिक्का भएर लाग्नुपर्ने समेत बताए ।
उद्घाटन कार्यक्रममा विराटनगर महानगरपालिकाका प्रमुख नागेश कोइराला, नेपाल उद्योग वाणिज्य महासंघ कोशी प्रदेशका अध्यक्ष राजेन्द्र राउतलगायतले शुभकामना व्यक्त गरेका थिए ।
फागुन १८ गतेसम्म सञ्चालन हुने महोत्सवमा विभिन्न खेलका प्रतियोगिताहरू मोरङ र झापालगायतको स्थानमा हुँदैछन् ।
महोत्सवमा प्रदेशस्तरीय महिला फुटबल, महिला तथा पुरुष दौड, महिला तथा पुरुष कब्बड्डी, भेट्रान बाघचाल, महिला तथा पुरुष टेबलटेनिस, महिला तथा पुरुष बुद्धिचाल, महिला तथा पुरुष कराते, महिला तथा पुरुष तेक्वान्दो र पुरुष सफ्टटेनिस र डोरीतानलगायतको खेलकुद प्रतियोगिता समावेश छन् ।
