विराटनगर । नेपाल स्काउट, विराटनगरको आयोजनामा गत शुक्रबारबाट सुरु भएको स्काउट तालिम अहिले जारी छ । विराटनगर महानगरपालिका–८ हाटखोलास्थित सुशीक्षा आधारभूत विद्यालयमा जारी तालिममा विराटनगरका शिक्षक–शिक्षिकाहरू सहभागी छन् ।
विराटनगर महानगरपालिकाको व्यवस्थापन र स्थानीय स्काउट कार्यालय विराटनगरको आयोजनामा भइरहेको तालिममा महानगरभित्रका सामुदायिक र संस्थागत विद्यालयका ४८ जना शिक्षक–शिक्षिकाहरूले विभिन्न क्रियाकलाप तथा सीप सिकिरहेका छन् ।
नेपाल स्काउट आधरभूत शिक्षक (बिटिसी/पिटिसी) तालिम ५ रात ६ दिनसम्म सञ्चालन हुनेछ ।
आगामी बुधबारसम्म हुने तालिममा उनीहरूले आधारभूत तहको तालिम लिइरहेको नेपाल स्काउट विराटनगर महानगरपालिका स्थानीय प्रमुख आयुक्त नवीन पहाडीले जानकारी दिए ।
पुरुषतर्फ कोर्स लिडरका रूपमा रहेका स्काउटका राष्ट्रिय प्रशिक्षक विराटनगरकै नवलप्रसाद उपाध्याय र महिलातर्फकी राष्ट्रिय प्रशिक्षक झापाकी शिवानी देवानले सहजीकरण गरिरहेका छन् ।
ती शिक्षकहरूले अब ११ वर्षदेखि १६ वर्षका विद्यार्थीहरूलाई स्काउटसम्बन्धी कक्षा संचालन गर्ने अनुमति पाउने छन् ।
उनीहरूले फन गेम र साहसिक गतिविधिसँगै विपद व्यवस्थापन अर्थात् किचन फायर सेफ्टी, प्राथमिक उपचारलगायत विषयमा तालिम पनि लिइरहेका छन् ।
साहसिक गतिविधिका लागि वटर फ्लाई गेट, टनल, मंकी क्रलिङ, ह्याङिग ब्रिज, टायर जम्प, मेड माइङ, बेम्बो वाक, थ्रीपोल टावर, टायर वाकलगायतका बनाइएको छ ।
