फुङ्लिङ । ताप्लेजुङको पाथीभरा (मुक्कुमलुङ) क्षेत्रमा निर्माणाधीन केबलकारको विषयलाई लिएर पक्राउ परेकामध्ये अधिकांश जिल्लाबाहिरका रहेको खुलेको छ ।
वीरेन्द्रचोकमा नो केबलकार अभियन्ता र प्रहरीबीच भएको झडपको क्रममा १५ जना पक्राउ परेका थिए । जिल्ला प्रहरी कार्यालय ताप्लेजुङले एक प्रेस विज्ञप्ति जारी गर्दै आपराधिक उपद्रव र हुलदङ्गा गर्ने अभियोगमा उनीहरूलाई पक्राउ गरेको जनाएको छ ।
पक्राउ पर्ने १५ जना मध्ये ताप्लेजुङका एक जना मात्र रहेका छन् । अन्य सबै जिल्ला बाहिरका रहेका छन् । जसमा चार जना महिला रहेका छन् ।
ताप्लेजुङको आठराई त्रिवेणी गाउँपालिका-१ निवासी ४५ वर्षका नवीन पोमू रहेका छन् । यस्तै, फिदिम नगरपालिका ११ पाँचथर निवासी २२ वर्षका एमन राई, फालेलुङ गाउँपालिका-८ घर भई हाल फिदिम नगरपालिका-१ बस्दै आएका ४० वर्षकी सुनिता केरुङ रहेका छन् ।
हिलिहाङ गाउँपालिका-६ घर भई हाल अर्जुनधारा नगरपालिका-११ निवासी ४८ वर्षका मित्र लिङदेन र मिक्लाजुङ गाउँपालिका-५ घर भई इलाम नगरपालिका-७ निवासी ५१ वर्षका योगेन्द्र लावती रहेका छन् ।
आठराई गाउँपालिका-७ तेह्रथुम घर भई हाल जिल्ला झापा अर्जुनधारा नगरपालिका ११ निवासी ३० वर्षकी दीक्षा भन्ने निर्मला बराल (दर्नाल) पक्राउ परेको प्रहरीले जनाएको छ ।
यस्तै शिवसतासी नगरपालिका २ झापा स्थायी घर भई बिर्तामोड नगरपालिका २ निवासी २० वर्षकी ईक्सा लिम्बू, अर्जुनधारा नगरपालिका ४ झापा निवासी २१ वर्षकी निहा चेम्जोङ पक्राउ परेका छन् ।
इटहरी उपमहानगरपालिका ३ सुनसरी निवासी २३ वर्षका विवेक लिम्बू, सोही निवासी १९ वर्षका जुरन राई, इटहरी उपमहानगरपालिका २ निवासी ३२ वर्षका अर्जुन भन्ने बिर्खबहादुर तामाङ, इटहरी उपमहानगरपालिका २० निवासी ३२ वर्षका अनुप सुब्बा, र इटहरी उपमहानगरपालिका १० निवासी १९ वर्षका विशेष सुब्बा रहेका छन् ।
ग्रामथान गाउँपालिका-६ मोरङ घर भई हाल सुन्दरहरैंचा नगरपालिका १० बस्दै आएका ५८ वर्षका तुलाराम तामाङ र उर्लाबारी नगरपालिका १ मोरङ निवासी ३९ को हरि लिम्बू गरी जम्मा १५ जना पक्राउ परेका छन् ।
शनिबार साँझ नो केबलका समूह र प्रहरीबीच झडप हुँदा २३ घाइते भएका छन् । झडपको क्रममा ११ जना प्रहरीसहित २३ जना घाइते भएका हुन् ।
११ जना प्रहरी र १२ जना प्रदर्शनकारी घाइते भएका छन् । घाइतेमध्ये १ जना प्रहरी र तीन जना आन्दोलनरत पक्षका कार्यकर्तालाई थप उपचारको लागि जिल्लाबाहिर रेफर गरिएको छ ।
अन्यको जिल्ला अस्पतालमा उपचार गरी डिस्चार्ज भइसकेको छ भने केही प्रहरीहरूको उपचार जारी रहेको छ ।
