विराटनगर । झोराहटको जनक मेमोरियल सेकेन्डरी बोर्डिङ स्कुलले हालै सम्पन्न छैटौं संस्करणको ग्रामथान गाउँपालिका अन्तर विद्यालययस्तरीय राष्ट्रपति रनिङ शिल्डका विजेता खेलाडीहरूलाई सम्मान गरेको छ ।
ग्रामथान–२ झोराहाटस्थित आफ्नो प्रांगणमा आइतबार एक कार्यक्रमको आयोजना गर्दै स्कुलले रनिङ शिल्डमा मेडल जित्ने आफ्ना विद्यार्थीहरूलाई सम्मान गरेको हो ।
जनक स्कुल राष्ट्रपति रनिङ शिल्डको साविकको विजेतासमेत हो । ग्रामथानका १३ संस्थागत र सामुदायिक स्कुललाई उछिन्दै पाँचौं संस्करणको राष्ट्रपति रनिङ शिल्डको विजेता बनेको थियो ।
त्यसबेला १० वटा गोल्ड जितेको जनक मेमोरियलले यसपालि पनि आफ्नो अब्बल प्रदर्शन कायमै राखेको थियो ।
फागुन ७ गतेदेखि दुई दिनसम्म ग्रामथान–६ स्थित पब्लिक माविमा भएको स्पर्धामा जनक मेमोरियल स्कुलले चारवटा विधामा स्वर्ण पदक जित्दै उत्कृष्ट प्रदर्शन गर्न सफल भएको छ ।
जनकका विद्यार्थीहरूले पुरुषतर्फको कबड्डीमा गोल्ड मेडल जितका थिए भने पुरुषतर्फकै आठ सय मिटर दौडमा पनि स्वर्ण पदक हात पारेको थियो ।
यसैगरी, पुरुषकै लङ जम्पमा स्वर्ण जितेको जनकले १५ सय मिटर दौडमा छात्रातर्फ पनि गोल्ड मेडल जितेको थियो ।
जनकबाट प्रतियोगितामा पदक जित्ने खेलाडीहरूलाई स्कुलका प्रिन्सिपल सुनील भगत, भाइस प्रिन्सिपल समुन्द्र पराजुली, कोर्डिनेटर ज्योति धितालले अबिर, खादा र माला लगाएर सम्मान गरेका हुन् ।
विजेता खेलाडीहरूलाई थप हौसला बढाउन भन्दै प्रिन्सिपल भगतले उनीहरूलाई पुरस्कारस्वरूप नगद प्रदान गरेका थिए ।
उनले पुरुष कबड्डी खेलाडीलाई नगद रु पाँच हजार रुपैयाँ र अरू स्वर्ण पदक विजेता खेलाडीलाई एक-एक हजार रुपैयाँ प्रदान गरेका थिए ।
विजेता विद्यार्थीहरूसँगै स्कुलले आफ्ना संस्थापक तथा खेल प्रशिक्षक करणकुमार माझीलगायत प्रशिक्षकहरूलाई पनि सम्मान गरेको थियो । विजेता विद्यार्थीहरूले नाचगान गर्दै जितको खुशीयाली साटासाट गरेका थिए ।
सम्मान कार्यक्रममा व्यवस्थापक सुखाराम माझी, आलोक अधिकारी, संस्थापक सुरेन्द्र भगत, वीरेन्द्र चौधरी, नित्यानन्द शाह, यमन सरदारलगायत शिक्षक–शिक्षिका र विद्यार्थीहरूको उपस्थिति रहेको थियो ।
विगत ३३ वर्षदेखि ग्रामथानको शिक्षा क्षेत्रमा निरन्तर योगदान दिन सफल भएको जनक पालिकाभरि नै उत्कृष्ट नतिजा ल्याउन सफल छ ।
त्यसका अलाबा पठनपाठनसँगै अतिरिक्त क्रियाकलापमा पनि आफूलाई साबित गराउँदै आएको जनकमा हाल एक हजारभन्दा बढी विद्यार्थी अध्ययनरत छन् ।
