विराटनगर । इलाममा टिपरको ठक्करबाट मोटरसाइकलमा सवार बाबु-छोराको मृत्यु भएको छ ।
इलामको रोङ गाउँपालिका-३ हाँसपोखरीमा शुक्रबार साँझ ६:४० मा भएको उक्त दुर्घटनामा बाबु-छोराको मृत्यु भएको हो ।
मेची राजमार्गमा इलामबाट झापातर्फ जाँदै गरेको को १ ख ६४६२ नम्बरको टिपरले विपरीत दिशाबाट आउँदै गरेको प्रदेश १-०३-००१ प १५८५ नम्बरको मोटरसाइकललाई ठक्कर दिएको थियो ।
दुर्घटनामा मोटरसाइकल चालक सूर्योदय नगरपालिका-६ खादी गाउँ बस्ने ४० वर्षका दीर्घ राई गम्भीर घाइते भएका थिए ।
उनको शरीरको विभिन्न भागमा चोट लागेको थियो ।
सोही मोटरसाइकलमा पछाडि सवार उनकै बुबा अन्दाजी ७० वर्षका पवन राईको पनि शरीरको विभिन्न भागमा चोट लागेर गम्भीर घाइते भएका थिए ।
उनीहरूलाई उपचारका लागि बिएण्ड सि अस्पताल बिर्तामोड ल्याइएकोमा थियो ।
तर, उपचारका क्रममा छोरा दीर्घको बेलुका ८:१२ बजे मृत्यु भएको थियो ।
उनको मृत्यु भएको ९ मिनेटपछि बुबा पवनले पनि प्राण त्यागेका थिए ।
बाबु-छोराको शव सोही अस्पतालमा रहेको प्रहरीले जनाएको छ ।
मोटरसाइकल, टिपर र टिपर चालक माईजोगमाई गाउँपालिका-२ शान्तिचोक बस्ने ३० वर्षका खगेन्द्र थामीलाई प्रहरी चौकी फिक्कलले नियन्त्रणमा लिएको छ ।
हुस्सु लागेर बाटो नदेखिँदा दुर्घटना भएको प्रहरीको प्रारम्भिक अनुसन्धानले देखाएको छ ।
