विराटनगर । विराटनगरको बूढानीलकण्ठ सेकेन्डरी इंग्लिस बोर्डिङ स्कुलले आफ्नो ४१औं वार्षिक उत्सव तथा अभिभावक दिवस मनाएको छ ।
विराटनगर महानगरपालिका–२ स्थित स्कुल प्रांगणमा विभिन्न कार्यक्रम आयोजना गरी स्कुलले वार्षिकोत्सव तथा अभिभावक दिवस मनाएको हो ।
वार्षिक उत्सवको उद्घाटन समारोहमा विद्यार्थीहरूले गीत, नृत्यलगायतका विभिन्न प्रस्तुतिबाट अभिभावक, शिक्षक र अतिथिहरूलाई दिनभरी मनोरञ्जन दिलाएका थिए ।
उद्घाटन समारोहलाई सम्बोधन गर्दै स्कुलका प्रिन्सिपल मणिराज भट्टराईले व्यवहारिक शिक्षासँगै विद्यार्थीहरूलाई नैतिक शिक्षा दिएर विद्यार्थीहरूलाई अगाडि बढाउने काम गरिरहेको बताए ।
विद्यार्थीहरूलाई गुणस्तरीय शिक्षा दिएको कारणले बूढानीलकण्ठ स्कुलले राष्ट्रलाई आवश्यक पर्ने दक्ष जनशक्ति उत्पादन गरिरहेको उनले स्मरण गराए ।
२०४० सालमा स्थापित स्कुलले विद्यार्थीहरूलाई गुणस्तरीय शिक्षा प्रदान गरेको कारण सबैको रोजाइमा पर्न सफल भएको उनको दाबी छ ।
वार्षिकोत्सवको अवसर पारेर स्कुलकासंस्थापक फाउण्डर अध्यक्ष खगेन्द्र पाण्डे र संस्थापक ज्ञानु पाण्डेलाई समेत सम्मान गरिएको थियो । उनीहरूलाई प्रमुख अतिथि पूर्वाञ्चल विश्वविद्यालयका उपकुलपति प्राडा विजुकुमार थपलियाले सम्मानपत्रका साथ दोसला ओढाएर सम्मान गरेका थिए ।
कार्यक्रमलाई सम्बोधन गर्दै थपलियाले नियमित रूपमा मेहनत गरेमा सफलतातर्फ उन्मुख हुन सकिने सुझाव विद्यार्थीहरूलाई दिए ।
स्कुलका सञ्चालक समितका अध्यक्ष बुद्धिबहादुर प्रधानको सभापतित्वमा भएको कार्यक्रममा संस्थापक अध्यक्ष पाण्डेले समते आफ्नो मन्तव्य राखेका थिए ।
वार्षिकोत्सव कार्यक्रम दुई चरणमा हुने बताइएको छ । पहिलो चरणमा नर्सरीदेखि कक्षा ४ सम्म आज र दोस्रो चरणमा कक्षा ५ देखि कक्षा १० सम्मका शनिबार हुने स्कुलले जनाएको छ ।
बूढानीलकण्ठ स्कुलमा नर्सरीदेखि कक्षा १० सम्म करिब १ हजार ३ सयभन्दा बढी विद्यार्थीहरू अध्ययनरत रहेको स्कुलले जनाएको छ ।
