विराटनगर । ताप्लेजुङका प्रमुख जिल्ला अधिकारीलाई ज्यान मार्ने धम्की दिएको आरोपमा एक जना पक्राउ परेका छन् ।
पक्राउ पर्नेमा फुङलिङ नगरपालिका-११ अस्थायी ठेगाना भएका ५२ वर्षीय प्रदीप मादेन रहेको ताप्लेजुङ प्रहरी प्रवक्ता डिएसपी रवि रावलले जानकारी दिए ।
रावलका अनुसार फुङलिङ नगरपालिका-११ मा ‘नो केबलकार समूह’ को आन्दोलनको नेतृत्व गरेका मादेनलाई अनुसन्धानका लागि मंगलबार बिहान पक्राउ गरिएको हो ।
प्रमुख जिल्ला अधिकारी नेत्रप्रसाद शर्मालाई शनिबार मोबाइल फोनमार्फत ज्यान मार्ने धम्की दिएको आरोपमा मादेनलाई पक्राउ गरिएको प्रहरीले जनाएको छ ।
आरोपितले मोवाइल फोनमार्फत ज्यान मार्ने धम्की दिनुका साथै अपशब्द बोलेको प्रमुख जिल्ला अधिकारी शर्माले बताएका छन् ।
प्रमुख जिल्ला अधिकारीलाई ज्यान मार्ने धम्की दिने आरोपितलाई फुङलिङ नगरपालिका-३ कोप्चेबजारबाट गिरफ्तार गरेको डिएसपी रावलले बताए ।
पहिचानवादी मोर्चा ताप्लेजुङको संयोजक रहेका मादेनमाथि शुक्रबार प्रहरीमाथि ढुंगामुढा गरेको आरोप छ ।
केबलकार निर्माणको विरोध गर्दै आएको नो केवलकार समूहले मंगलबारदेखि जिल्लामा चक्काजाम गरेको छ ।
