विराटनगर । ताप्लेजुङको फुङलिङ नगरपालिका–११ मा रहेको पाथीभरा क्षेत्रमा केबलकार निर्माणको विरोधमा उत्रिएको ‘नो केबलकार समूह’ले मंगलबार (भोलि) देखि पूर्वका विभिन्न सडक बन्द गर्ने भएको छ ।
पाथीभरा (मुक्कुमलुङ) मा केबलकार निर्माण खारेजीको माग गर्दै आन्दोलनरत पहिचान पक्षधरले भोलिदेखि अनिश्चितकालीन यातायात बन्दको घोषणा गरेको हो ।
मुक्कुमलुङ संरक्षण संयुक्त संघर्ष समितिले मेची राजमार्ग, तमोर करिडोर र तेह्रथुमबाट ताप्लेजुङ जाने नाका बन्द गरेको हो ।
पहिचान आन्दोलन प्रचारप्रसार समितिका जेन्टल लावतीका अनुसार चारआलीदेखि ताप्लेजुङसम्मै यातायात बन्द हुने जानकारी दिए ।
उनका अनुसार मोटरसाइकल र अत्यावश्यक सवारी साधन भने चल्न दिइने भए पनि सार्वजनिक बस, निजी सवारी साधन बन्द हुने छ ।
केबलकार निर्माणको काम खारेजी नहुन्जेल र आन्दोलनमा परी घाइते भएकाहरूलाई सरकारले क्षतिपूर्ति नदिउन्जेलका लागि बन्दको घोषणा गरिएको उनको भनाइ छ ।
पाथीभरा क्षेत्रमा केबलकार बनाउन नहुने भन्दै पहिचान पक्षधरहरू निरन्तर आन्दोलित छन् । पहिचान पक्षधरले सेल्टरको रूपमा प्रयोग गर्दै स्थानमा पहिचान पक्षधरलाई तितरबितर पार्न प्रहरीको टोली पुग्दा झडप नै भएको थियो ।
माघ १२ गते साँझ सेल्टर क्षेत्रमा पुगेको प्रहरीलाई आन्दोलनरत पक्षले माथिबाट रोक्न खोजेपछि प्रहरीले गोली चलाएको थियो ।
उक्त घटनामा १९ प्रहरी र ६ जना प्रदर्शनकारी घाइते भएको थिए ।
प्रहरीको गोली लागेर गम्भीर घाइते भएका तीन आन्दोलनकारीको उपचार हाल काठमाडौंमा भइरहेको छ ।
प्रहरीले चलाएको गोली प्रहारबाट विरोधी समूहका तेहृथुम जिल्ला, म्याङलुङ नगरपालिका-९ का ३६ वर्षीय यामबहादुर लिम्बू, मिक्लाजुङ गाउँपालिका-५ का सगुन लावती, फुङलिङ नगरपालिका-८ का २० वर्षीय धर्म पालुङ्गवा र मिक्लाजुङका १७ वर्षीय बालक मंगोल लावती घाइते भएका छन् ।
यामबहादुरको बाँया गोडामा गोली लागेको छ । उनलाई जिल्ला अस्पतालमा प्राथमिक उपचार पश्चात नोबेल अस्पताल, विराटनगर रेफर गरिएको थियो ।
सगुन लावती अगाडीको बाँया छातीबाट गोली लागि पछाडिबाट बाहिरिएको र स्वास्थ्य अवस्था मध्यम रहेको छ ।
धर्म पालुङ्वाको बाँया कुममा चोट लागि हड्डी भाँचिएको छ । यामबहादुर, सगुन र धर्मलाई नोबेलबाट काठमाडौं पठाइएकोमा बाँया आँखामा चोट लागेका मंगोल लावतीको भने जिल्ला अस्पतालमा उपचार भइरहेको छ ।
