विराटनगर । ताप्लेजुङको फुङलिङ नगरपालिका–११ मा रहेको पाथीभरा क्षेत्रमा केबलकार निर्माणको विरोधमा उत्रिएको ‘नो केबलकार समूह’ र प्रहरीबीच भएको झडपमा परी घाइते भएका तीन जनालाई काठमाडौं लगिएको छ ।
घटनामा १९ प्रहरी र ६ जना प्रदर्शनकारी घाइते भएकोमा प्रहरीको गोली लागेर गम्भीर घाइते भएका तीन आन्दोलनकारीलाई थप उपचारको लागि नेपाली सेनाको हेलिकप्टरबाट काठमाडौं लगिएको हो ।
उनीहरूलाई थप उपचारका लागि आइतबार बिहान मात्रै विराटनगरको नोबेल शिक्षण अस्पताल ल्याइएको थियो । नोबेलबाट थप उपचारका लागि काठमाडौं पठाएको हो ।
केवलकार निर्माणको विरोध गर्दै आएको समूहले प्रहरीलाई आक्रमण गरेपछि प्रहरीले आत्मरक्षाका लागि गोली चलाएको जिल्ला प्रशासन कार्यालयले जनाएको छ ।
नो केबलकार समूहको आक्रमणमा नेपाल प्रहरीका ११ जना र सशस्त्र प्रहरीका नौ जना गरी २० जना घाइते भएका थिए ।
नो केबलकार समूहले आक्रमण गरेपछि प्रहरीले आत्मरक्षाका लागि गोली चलाएको प्रमुख जिल्ला अधिकारी नेत्रप्रसाद शर्मा पौडेलले बताए ।
प्रहरीले चलाएको गोली प्रहारबाट विरोधी समूहका तेहृथुम जिल्ला, म्याङलुङ नगरपालिका-९ का ३६ वर्षीय यामबहादुर लिम्बू, मिक्लाजुङ गाउँपालिका-५ का सगुन लावती, फुङलिङ नगरपालिका-८ का २० वर्षीय धर्म पालुङ्गवा र मिक्लाजुङका १७ वर्षीय बालक मंगोल लावती घाइते भएका छन् ।
यामबहादुरको बाँया गोडामा गोली लागेको छ । उनलाई जिल्ला अस्पतालमा प्राथमिक उपचार पश्चात नोबेल अस्पताल, विराटनगर रेफर गरिएको थियो ।
सगुन लावती अगाडीको बाँया छातीबाट गोली लागि पछाडिबाट बाहिरिएको र स्वास्थ्य अवस्था मध्यम रहेको छ ।
धर्म पालुङ्वाको बाँया कुममा चोट लागि हड्डी भाँचिएको छ । यामबहादुर, सगुन र धर्मलाई नोबेलबाट काठमाडौं पठाइएकोमा बाँया आँखामा चोट लागेका मंगोल लावतीको भने जिल्ला अस्पतालमा उपचार भइरहेको छ ।
केबलकार निर्माण खारेजीको माग गर्दै पहिचान पक्षधरहरू बलुडाँडामा भेला भएका छन् । यो क्षेत्रलाई पहिचान पक्षधरले सेल्टरको रूपमा प्रयोग गर्दै आएको प्रहरीले जनाएको छ ।
प्रहरी टोली पहिचान पक्षधरलाई तितरबितर पार्न शनिबार दिउँसो सो क्षेत्रमा पुगेको थियो ।
माघ १२ गते साँझ पुनः सेल्टर क्षेत्रमा पुगेको प्रहरीलाई आन्दोलनरत पक्षले माथिबाट रोक्न खोजेपछि प्रहरीले गोली चलाएको थियो ।
शान्तिपूर्ण आन्दोलनको तयारी गर्दा राज्यले मान्छे ताकेर गोली प्रहार गरेको किराँत याक्थुङ चुम्लुङकी महासचिव निरन्ती तुम्बापोले आरोप लगाएकी छन् ।
