खोटाङ । स्वास्थ्यलाई असर गर्ने र फजुल खर्च हुने भएकाले खोटाङको एउटा सिंगो गाउँले कोक, स्प्राइटजस्ता कोल्ड ड्रिंक्स प्रतिबन्ध लगाएको छ ।
जिल्लाको दिक्तेल रूपाकोट मझुवागढी नगरपालिका–१० पाथेकाको साविक ३ नम्बर वडा टोल विकास समितिले ड्यु, स्प्राइट, पेप्सी, कोकजस्ता आयातित पेय पदार्थ प्रयोग नगर्ने निर्णय गरेको हो ।
समितिको माघ १२ गते भएको निर्णयअनुसार आगामी दिनमा गाउँमा हुने शुभकार्य वा अशुभकार्य सबैमा ड्यु, पेप्सी, कोक जस्ता पेय पदार्थ प्रयोग गर्न पाइने छैन् ।
टोल विकास समितिले गरेको निर्णय उल्लंघन गरेमा पहिलो पटक ५ हजार, दोस्रो पटक ७ हजार र तेस्रो पटक १० हजार जरिवाना तिर्ने निर्णयसमेत गरिएको टोल विकास समितिका अध्यक्ष सर्वधन राईले बताए ।
गाउँमा हुने बिहे, पास्नी, छेवर, मरौपरौ जस्ता सामाजिक कार्यमा बहुराष्ट्रिय तथा राष्ट्रिय कम्पनीका पेय पदार्थलाई प्रयोग नगर्ने निर्णय गरिएको उनको भनाइ छ ।
टोल विकास समिति एवं साविक तीन नम्बर वडामा ४० घर रहेका छन् । उक्त ४० घर नै साम्पाङ राईको रहेको छ ।
सबै घरका सदस्य उपस्थित भएर पेय पदार्थ बन्द गर्ने निर्णय गरिएको अध्यक्ष राईले बताए ।
हाल ड्यु, पेप्सी, कोक गाउँमा प्रतिबन्ध गरिएको छ । अब विस्तारै अन्य बियर, रम जस्ता आयातीत पेय पदार्थ र जंग फुट पनि प्रतिबन्ध गर्ने योजना बनाइएको टोल विकास समितिका अध्यक्ष राईले बताए ।
ड्यु, पेप्सी, कोकको सट्टा हाललाई चिया, दुध दही प्रयोग गरिने उनको भनाइ छ ।
सम्भव भएसम्म गाउँमै स्थानीय फलफुलको जुस उत्पादन गरेर प्रयोग गर्ने योजना रहेको अध्यक्ष राईले बताए ।
अहिले गाउँमा हुने हरेक कार्जेमा ड्यु, पेप्सी, कोक अनिवार्य जस्तै भएका छन् ।
जसकारण सामन्य कार्जे गर्दा पनि २० हजार बढी ड्यु कोकमै खर्च हुने गरेको छ ।
उक्त फजुल खर्च रोक्न यस्तो निर्णय गरिएको टोल विकास समितिका सल्लाहकार ओमकार राईले बताए ।
खोटाङकै बुइपाका पाँच गाउँले पनि आयातीत पेय पदार्थ यस अघिनै रोक्ने निर्णय गरिसेकेका छन् ।
बुइँपाको गैरीफुलेली, टारी, खुसुङ्खा, उर्लेनी र छापगाउँले आयातीत पेय पदार्थमा रोक लगाएका हुन् ।
