विराटनगर । बिपी राजमार्गमा पर्ने सिन्धुलीको सुनकोशी गाउँपालिका-७ मा सुनकोशी नदीमा खसेको अवस्थामा एउटा मोटरसाइकल फेला परेको छ ।
ज १० प २६०४ नम्बरको मोटरसाइकल सुनकोशी नदीमा खसेको अवस्थामा फेला परेको हो ।
नदीमा डुबेको अवस्थामा आइतबार बिहान मोटरसाइकल र झोला फेला परेको हो । मोटरसाइकल र झोलाभित्र ब्लुबुक भेटिए पनि यात्रु भने नभेटएिको प्रहरीले जनाएको छ ।
मोटरसाइकल चालक नदीमा बेपत्ता भएको आशंका गरिएको छ ।
जिल्ला प्रहरी कार्यालय सिन्धुलीका इन्सपेक्टर सुनिल चौरसियाका अनुसार मोटरसाइकलकसँगै फेला परेको झोलामा सर्लाहीको बरहथवा नगरपालिका वडा नम्बर-७ ठेगाना भएका युवकको ब्लुबुक पनि फेला परेको हो ।
ब्लुबुकमा उल्लेख नाम भने प्रहरीले खुलाएको छैन ।
दुर्घटना गएराति नै भएको अनुमान प्रहरीले गरेको छ । खुर्कोटस्थित इलाका प्रहरी कार्यालयले भने घटनाबारे आइतबार बिहान ८ बजे मात्रै जानकारी पाएको जनाएको छ ।
नदीमा बेपत्ता यात्रुको खोजी कार्य भइरहेको र घटनाबारे थप अनुसन्धान जारी रहेको इन्सपेक्टर चौरसियाले बताए ।
