विराटनगर । सामाजिक अभियन्ता बताउने आशिका तामाङ हाल हिरासतमा छिन् । अभद्र व्यवहार कसुर शीर्षकमा माघ २ गते पक्राउ परेकी आशिका अहिले गौशाला प्रहरी चौकीको हिरासतमा छिन् ।
आइतार साँझ उनको सामाजिक सञ्जाल फेसबुकमार्फत् एउटा पोस्ट भएको छ, जसमा उनले आफूले गल्ती महसुस गरेको बताएकी छन् ।
‘मलाई प्रहरीले समातेर हिरासतमा राखेपछि छोराछोरीले जर्मन बाउसँग कुरा गर्न पाएको छैनन् । मेरो दुई ओटै फोन प्रहरीले जफत गरेर चौकीमै छ, अनुसन्धान हुँदैछ होला, के होला !,’ आशिकालाई भेट्न पुगेका भाइलाई उनले भनेकी छन्, ‘उता जर्मन बाउसँग कुरा गराइदे है कान्छा ।’
‘आशिका दिदीको मुहारमा प्रष्ट देखिन्थ्यो, उहाँ छोराछोरीलाई धेरै सम्झिरहनु भएको छ भनेर आफ्नो गल्ती पनि महसुस गर्नु भएको छ,’ उनले भनेकी छन्, ‘भोलि प्रहरीले म्याद थप्न लाने भन्नू भएको छ रे । के हो मैले बुझेकी छैन । मैले माफी पनि मागीसकेँ । म अन्याय सहन नसक्ने बोल्दा अलि बढी बोल्न पुगेँ । मैले यसलाई महसुस गरेर माफी पनि मागिसकेँ । तर फेरि भक्तपुर चौकी लाने रे म्याद थप्ने भन्ने के के कुरा आएको छ ।’
यसैगरी उनले आफूलाई हिरासतमा बस्न वा जेल बस्न डर नलागे पनि छोराछोरीको पीरले सताएको सुनाइन् ।
‘हिरासत वा जेल बस्नमा मलाई कति पनि डर छैन, चिन्ता छैन,’ उनले भनेकी छन्, ‘तर मेरो छोराछोरीलाई के होला भनेर मात्र पीर परेको छ कान्छा । राम्रोसँग खाना दे है, पैसा छैन भने मैले ल्याएको अलि कति चार-पाँच सय युरो होला । साटेर चला है ।
छोराछोरीलाई मम्मी गाउँ जानू भएको छ दुई-चार दिन काम सकेर छिटै आउनु हुन्छ भन्नू है ।’
गत पुस २६ गते पशुपति क्षेत्र विकास कोषको पत्र जाहेरी र पुस २५ को प्रहरी प्रतिवेदनका आधारमा अनुसन्धान गर्न तामाङलाई पक्राउ गरिएको थियो ।
तामाङविरुद्ध प्रहरीले पुस २८ गते नै अभद्र व्यवहार कसुर शीर्षकमा जिल्ला प्रशासन कार्यालय बबरमहल काठमाडौंबाट पक्राउ पुर्जी लिएको थियो ।
जिल्ला प्रशासनको अनुमतिले बुधबार तामाङलाई पक्राउ गरिएको प्रहरीको भनाइ छ ।
पछिल्लो समय पशुपति क्षेत्र विकास कोष परिसरमा तामाङले महिला प्रहरीलाई दुर्व्यवहार गरेको भिडिओ सामाजिक सञ्जालमा भाइरल बनेको थियो ।
उनले आफूलाई सामाजिक अभियन्ता भन्दै फेसबुकलगायत सामाजिक सञ्जालमा भिडिओहरू पनि पोस्ट गर्ने गरेकी छन् ।
कुनै बेलाकी चलचित्र कलाकार, पेसाले नर्स आशिका पछिल्लो समय सोसल मिडियामा निकै चर्चित छिन् ।
१५ वर्ष जर्मनी बसेर स्वदेश फर्केकी उनी अहिले नेपालका सरकारी निकाय, सार्वजनिक स्थानमा भइरहेको आर्थिक बेथिति र अत्याचारको उजागर गर्दै आएको दाबी गर्छिन् ।
केही वर्षअघि ‘जनावरको हत्या गर्नु, खानु तर घरपरिवार, घरबार नभएका खसी, खसिनीहरूलाई हत्या गर्नू’ भनेर ट्रोल बनेकी उनले यसबीचमा ‘दुःखी, पीडित’लाई सहयोग गरेर मनग्य समर्थक पनि बटुलिसकेकी छन् ।
फेसबुकमा उनलाई १५ लाखले फलो गरेका छन् । केही वर्षयता समर्थकले उनलाई ‘सामाजिक अभियन्ता’ भन्ने गरेका छन् ।
