विराटनगर । शनिबार साँझतिर कोशी प्रदेशका पूर्वमुख्यमन्त्री उद्धव थापा पिकनिक खाएर फर्किँदै थिए । नेपाल प्रेस युनियन झापाले दोमुखामा आयोजना गरेको पिकनिक कार्यक्रममा सहभागी भएर उनी घरतर्फ लागेका थिए ।
नेपाली कांग्रेस कोशी प्रदेश संसदीय दलका नेतासमेत रहेका थापाको गाडीमा चालक र पिएसओ पनि थिए । साँझ करिब ६ बजे पूर्व–पश्चिम राजमार्गमा थापा चढेको बा १ झ ६५३ नम्बरको गाडीले अर्को एउटा गाडीलाई ओभरटेक गर्यो ।
थापा सवार गाडीले उछिनेको गाडीमा नेपाल विद्युत् प्राधिकरण सुरुङ्गाका कर्मचारी थिए । प्राधिकरणको बा.१ झ १८७० नम्बरको गाडी पछि पर्यो । पुनः उनीहरूले थापा सवार गाडीलाई ओभरटेक गरे । यसपछि भने उनीहरूले पूर्वमुख्यमन्त्री थापा चढेको गाडीलाई उछिन्न दिएनन्, न त साइड नै दिए ।
विद्युत्को गाडीले साइड नदिएको भनेर थापाका ड्राइभर जंगिए । एकतमासले साइरन बजाएपछि विद्युत्को गाडी रोकियो । साँझ करिब ६ बजे पूर्व–पश्चिम राजमार्गको कनकाई नगरपालिका –२ जुकेकल्भर्ट भन्ने स्थानमा रोकिएर थापा सवार गाडी र प्राधिकरणका कर्मचारी सवार गाडी रोकिए ।
दुवै गाडीका चालकले एकछिन भनाभन गरे । आगलागीमा हिँडेको बताउने उनीहरूले थापाका चालकलाई अश्लील शब्द प्रयोग गर्दै भने, ‘भिआइपी भन्दैमा मनलाग्दी गर्ने ?’
थापाका चालक र पिएसओ बाहिर रहेर विवाद गरिरहँदा थापा भने गाडीभित्रै थिए । विद्युत् सर्ट भएर आगलागी भइरहेको बताएपछि थापाले गाडीको झ्याल खोले र भने, ‘आगलागी हो भने हामी पनि जान्छौं !’
लगत्तै थापाका ड्राइभरले विद्युत्का चालकलाई थप्पड हिर्काए । त्यसपछि गल्तीबिना आफूलाई कुटेको भन्दै प्राधिकरणका चालकले थापाका ड्राइभरलाई मुक्का बजारे । अनि, थापालाई अश्लील गाली गर्दै ती कर्मचारीले आँखामाथि एक बक्सिङ हाने ।
त्यतिबेलासम्म पिएसओले ‘ए…ए’ मात्र भन्न भ्याए ! विद्युत्का कर्मचारी भने गाडी स्टार्ट गरेर हुँइकिए ।
पछि प्रहरीले पूर्वमुख्यमन्त्री थापामाथि आक्रमण गर्ने दुई जनालाई पक्राउ गर्यो । पक्राउ पर्नेमा शिवसताक्षी नगरपालिका ११ का ४९ वर्षीय भक्तबहादुर कटुवाल र कनकाई नगरपालिका ३ का ४२ वर्षीय पृथ्वी श्रेष्ठ रहेका छन् । उनीहरूलाई इलाका प्रहरी कार्यालय, बिर्तामोडमा राखिएको छ ।
थापा बिर्तामोडस्थित बिर्तासिटी अस्पतालमा उपचारपछि आफ्नो निवासमा फर्किएका छन् । थापाको कुटपिटबाट आँखा सुन्निएको र अनुहारमा चोट लागेको छ । यसै विषयलाई लिएर नेपाली कांग्रेस झापाले कारबाहीको माग गरेको छ ।
(घटनाबारे थापाका स्वकीय सचिव नविन बिमली र प्राधिकरणका एक कर्मचारीसँग शब्द एक्सप्रेसले गरेको फोन संवादको आधारमा तयार गरिएको हो )
