विराटनगर । कोशी प्रदेशका पूर्वमुख्यमन्त्री तथा नेपाली कांग्रेस संसदीय दलका नेता उद्धव थापामाथि आक्रमण गर्ने दुई जना पक्राउ परेका छन् ।
गृहजिल्ला झापाको कनकाईस्थित जामुनबारी चोकमा थापामाथि शनिबार साँझ आक्रमण भएको थियो ।
कुटपिटमा संलग्न भएको भन्दै प्रहरीले दुई जनालाई पक्राउ गरेको हो ।
पक्राउ पर्नेमा शिवसताक्षी नगरपालिका ११ का ४९ वर्षीय भक्तबहादुर कटुवाल र कनकाई नगरपालिका ३ का ४२ वर्षीय पृथ्वी श्रेष्ठ रहेका छन् ।
उनीहरू दुवै विद्युत् प्राधिकरण सुरुंगाका कर्मचारी रहेको बुझिएको छ ।
भिआइपी सवार गाडीलाई साइड नदिएको र भिआइपी भनेर चिनेपछि उनीहरू थापामाथिआक्रमण गरेका हुन् ।
उनीहरूलाई इप्रका बिर्तामोडमा राखिएको छ ।
नेपाल प्रेस युनियन झापाले दोमुखामा आयोजना गरेको पिकनिक कार्यक्रममा सहभागी भएर थापा घरतर्फ फर्किँदै थिए ।
त्यसैक्रममा हिजो साँझ करिब ६ बजे पूर्व–पश्चिम राजमार्गको कनकाई नगरपालिका –२ जुकेकल्भर्ट भन्ने स्थानमा उनीमाथि कुटपिट भएको थियो ।
विद्युत प्राधिकरण सुरुङ्गाका कर्मचारी सवार गाडीलाई थापा चढेको गाडीले ओभरटेक गर्ने क्रममा विवाद भएको थियो ।
विद्युत प्राधिकरण सुरुंगाका कर्मचारी चढेको बा.१ झ १८७० नम्बरको गाडीलाई थापा चढेको बा १ झ ६५३ नम्बरको गाडीले ओभरटेक गर्न खोजेपछि विवाद भएको थियो ।
थापाको सुरक्षामा खटिएका सुरक्षाकर्मीले ‘भिआईपी’ भनेर जानकारी गराउँदै गर्दा एक युवकले मुक्का प्रहार गरेका थिए ।
थापा बिर्तामोडस्थित बिर्तासिटी अस्पतालमा उपचारपछि आफ्नो निवासमा फर्किएका छन् । थापाको कुटपिटबाट आँखा सुन्निएको र अनुहारमा चोट लागेको छ ।
