विराटनगर । मोरङको ग्रामथान गाउँपालिका–२ जनक मेमोरियल सेकेन्डरी बोर्डिङ स्कुलको सञ्चालक समितिमा नयाँ सदस्यहरूको आगमन भएको छ ।
विद्यालयको भाइस प्रिन्सिपल, कोर्डिनेटर र काउन्सेलरका रूपमा स्कुलले नयाँ सदस्यहरूलाई भित्र्याएको हो ।
शुक्रबार एक कार्यक्रमको आयोजना गर्दै स्कुलले भाइस प्रिन्सिपलका रूपमा समुन्द्र पराजुली, परामर्शदाताका रूपमा नित्यानन्द साह र कोर्डिनेटरका रूपमा ज्योति धिताललाई भित्र्याएको हो ।
उनीहरूलाई जनकका प्रिन्सिपल सुनील भगत, विद्यालय व्यवस्थापन समितिका अध्यक्ष बद्रीप्रसाद रिजाल बोर्ड डाइरेक्टरका पदाधिकारी यमनाथ पौडेललगायतले स्वागत गरेका थिए ।
स्वागत कार्यक्रममा बोल्दै प्रिन्सिपल भगतले शिक्षण सिकाइका अलाबा अतिरिक्त क्रियाकलापमा पनि अब्बल देखिएको स्कुललाई नयाँ सदस्यको आगमनले थप सशक्त बनाउने बताए ।
हाल स्कुलले प्याब्सन स्पोर्ट्स मिट र राष्ट्रपति रनिङ शिल्डको तयारी थालेको उनको भनाइ छ ।
कोर्डिनेटरमा नियुक्त भएका ज्योति धितालले आगामी दिनमा आफ्नो जिम्मेवारीबाट नपन्छिने बताउँदै समस्या, गुनासाहरू निर्धक्कका साथ राख्न विद्यार्थीहरूलाई आग्रह गरे ।
यसैगरी, विद्यालय व्यवस्थापन समितिका अध्यक्ष बद्रीप्रसाद रिजालले जनक स्कुल विगत ३३ वर्षदेखि शिक्षा क्षेत्रमा निरन्तर योगदान दिन सफल भएको बताउँदै नयाँ सदस्यको आगमनबाट थप योगदान थपिने बताए ।
कार्यक्रममा व्यवस्थापक सुखाराम माझी, बोर्ड डाइरेक्टरका पदाधिकारी कुमार खतिवडा, सुरज अधिकारी, आलोक अधिकारी, सुरेन्द्र माझी, वीरेन्द्र चौधरी, करण माझी तथा अन्य शिक्षक–शिक्षिका र विद्यार्थीहरूको उपस्थिति रहेको थियो ।
पालिकाभरि नै उत्कृष्ट नतिजा ल्याउन सफल जनकमा हाल एक हजारभन्दा बढी विद्यार्थी अध्ययनरत छन् ।
