विराटनगर । मोरङको विराटनगर महानगरपालिकास्थित शनिमन्दिरनजिक ट्रकको ठक्करबाट साइकलयात्री १५ वर्षीय बालक घाइते भएका छन् ।
कोशी लोकमार्गअन्तर्गत बिहीबार दिउँसो भारतीय ट्रकको ठक्करबाट कटहरी गाउँपालिका-४ निवासी मधुसुधन सिंहका १५ वर्षीय छोरा सिताराम सिंह घाइते भएका हुन् ।
दिउँसो २:५५ बजेतिर महेन्द्र चोकबाट बरगाछीतर्फ जाँदै गरेको भारतीय नम्बर प्लेट आर जे १९ जीई ६१०० नम्बरको ट्रकले बाटो काट्ने क्रममा रहेका सिंहलाई ठक्कर दिएको थियो ।
जसमा उनको दाहिने खुट्टा भाँचिएको थियो । उनलाई कोशी अस्पताल पुर्याएर उपचार थालिएको मोरङ ट्राफिक प्रमुख राजन लम्सालले जानकारी दिए ।
उनका अनुसार ठक्कर दिने ट्रक भने तत्काल फरार थियो । केही समयपछि प्रहरीले भारतको राजस्थान जोधपुर निवासी ३८ वर्षीय ट्रक चालक याकुप खानलाई नियन्त्रणमा लिएको हो ।
उनीमाथि थप अनुसन्धान भइरहेको इन्स्पेक्टर लम्सालले जानकारी दिए ।
