ग्रामथान गाउँपालिका–२ झोराहटस्थित जनक मेमोरियल सेकेन्डरी बोर्डिङ स्कुलले सोमबारबाट दुई दिने विन्टर क्याम्पको थालनी गरेको छ । जनकबाट स्काउटमा आबद्ध ४५ जना विद्यार्थीहरूलाई सहभागी गराएर जनक स्काउट दलले आजदेखि विन्टर क्याम्प सुरु गरेको हो ।
विन्टर क्याम्पको उद्घाटन ग्रामथान गाउँपालिकाका अध्यक्ष नमोनारायण माझी, नेपाल स्काउटको सहराष्ट्र प्रमुख आयुक्त किरण गिरी, स्कुलका प्रिन्सिपल सुनिल भगत, विद्यालय व्यवस्थापक सुखाराम माझी, लेखा अधिकृत आलोक अधिकारीलगायतले विन्टर क्याम्पको उद्घाटन गरे ।
उद्घाटन समारोहमा बोल्दै प्रमुख अतिथि माझीले यस्ता खेलकुदका कार्यक्रमले विद्यार्थीहरूलाई निकै नै फाइदा तुल्याउने सुनाए । यसैगरी माझीले सामुदायिक विद्यालयसँगै शिक्षा क्षेत्रमा योगदान दिने संस्थागत विद्यालयलाई पनि पालिकाबाट आउने अवसर दिलाउने प्रतिबद्धता जनाए ।
कार्यक्रममा बोल्दै नेपाल स्काउटका सहराष्ट्र प्रमुख आयुक्त किरण गिरीले विद्यार्थीहरूको आत्मबल, ज्ञान, सिप र अनुशासन बढाउन पनि विन्टर क्याम्पले ठुलो भूमिका खेल्ने बताए ।
स्वागत् मन्तव्य राख्दै विद्यालयका प्रिन्सिपल सुनिल भगतले स्काउटको मर्म र भविष्य देखेर यतातर्फ विद्यार्थीलाई आबद्ध गराउने ग्रामथानकै जनक पहिलो स्कुल भएको सुनाए । जनक स्कुलको स्काउट ट्रुपले विद्यार्थीमा थप आत्मविश्वास बढाउन उल्लेखनीय काम गरिरहेको भगतको भनाइ छ ।
विन्टर क्याम्पमा वटर फ्लाई गेट, टनल, मंकी क्रलिङ, ह्याङिग ब्रिज, टायर जम्प, मेड माइङ, बेम्बो वाक, थ्रीपोल टावर, टायर वाकलगायत विधामा सहभागी गराइने क्याम्प चिफ प्रल्हाद राजवंशीले बताए । उनका अनुसार फन गेम र साहसिक गतिविधिमात्र नभएर विपद व्यवस्थापन (किचन फायर सेफ्टी), प्राथमिक उपचारलगायत विषयमा तालिम पनि विन्टर क्याम्पमा दिइने बताए ।
उद्घाटन कार्यक्रममा स्काउट आबद्ध जनकका विद्यार्थीका साथै शिक्षक–शिक्षिका, अभिभावकहरूको पनि उपस्थिति रहेको थियो ।
