विराटनगर । एकै जनाको शरीरमा एउटामात्र किड्नी र दुईवटा पाठेघर हुनु सम्भवतः अस्वभाविक नै मानिन्छ । यस्तो शारीरिक विविधतामा जन्म लिएकी २९ वर्षीया बबिता भट्टराई अहिले कन्तबिजोगको अवस्थामा छिन् ।
हल्दिबारी गाउँपालिका–७ गोल्टार घर भएकी बबिताले पछिल्लो पाँच वर्षयता पाठेघरको समस्या बेहोरिरहेकी छन् ।
एउटा पाठेघर केही वर्षअघि नै फालेकी बबिताको अर्को पाठेघरमा क्यान्सरको संक्रमण भएको आशंका चिकित्सकहरूको छ ।
उनको उपचारमा संलग्न महिला प्रसूति तथा स्त्री रोग विशेषज्ञ डाक्टर ऋचा भट्टराईले आर्थिक अवस्था जर्जर रहेकी बबिताको उपचार हुन नपाएको सुनाइन् ।
आर्थिक रूपमा कमजोर अवस्थाकी बबिता धेरैपटक अस्पताल धाउँदासमेत अपरेसन खर्च नभएर माइती घरमै थला परेकी छन् ।
विगत केही वर्षयता धरान उपमहानगरपालिका–१४ स्थित आफ्नो माइती बस्न थालेकी बबिता काखे छोरी च्यापेर आफ्नो उपचारका लागि सहयोगी मनहरूसँग आर्थिक सहयोगको अपेक्षामा भौतारिइरहेकी छन् ।
धरानस्थित बिपी कोइराला स्वास्थ्य विज्ञान प्रतिष्ठानमा उपचार गराइरहेकी बबितालाई पाठेघरमा क्यान्सर संक्रमण भएको डाक्टरहरूको आशंका छ, क्यान्सर फैलिन नदिन अपरेसन गरेर पाठेघर फाल्नुपर्ने हो ।
जसका लागि पुस १७ गतेका लागि डाक्टरहरूले पाठेघरको अपरेसन गर्न बबितालाई मिति नै तोकेका थिए ।
उपचारमा अढाइ लाखसम्म लाग्ने भनेर डाक्टरहरूले बताए पनि बबिताले उपचार खर्च नभएका कारण अस्पताल नै जान नपाएको गुनासो गरेकी छन् ।
बबिताकी पाँच वर्षीया छोरी छिन् । दुबईमा रहेका श्रीमान भने आफ्नो उपचारमा भन्दा ऋण तिर्नतिर लागेको बबिताको दुःखेसो छ । जन्मजात दुईटा पाठेघर र एउटामात्र किड्नी भएको बताउने बबिताले पाँच वर्षअघि अपरेसन गराएकी थिइन् ।
त्यसयता, पाठेघर दुख्ने समस्याले निकै नै सताएपछि गत असारमा पुनः उनले अपरेसन गराइन् ।
त्यसबेला नै डाक्टरले क्यान्सर हुनसक्ने बताउँदै पाठेघर फाल्न सुझाएका थिए । जसका लागि मिति नै तय हुँदासमेत उपचार खर्च नहुँदा बबिताको अपरेसन हुन पाएन ।
अपरेसनका लागि खर्च जुटाइदिन उनले आफ्ना आफन्त र सहयोगी मनहरूलाई अपिल गरेकी छन् ।
उनलाई सहयोग गर्न चाहनेहरूले बबिता भट्टराईको सानिमा विकास बैंकको ०३५०११०९०००१५९३ मा आफूले सकेको सहयोग गर्न सक्नुहुनेछ ।
