विराटनगर । मोरङको विराटनगर महानगरपालिका–२ मा अवस्थित सेन्ट जोसेफ स्कुलले दुईदिने सयुक्त राष्ट्रसंघीय ढाँचाको कार्यक्रम सम्पन्न गरेको छ ।
बिहीबार र शुक्रबार दुई चरणको ‘मोडल अफ युनाइटेड नेसन’ (मुन) कार्यक्रम गरेको सेन्ट जोसेफले विश्वमा विद्यमान समस्या र समाधानका बाटोबारे स्कुलका विद्यार्थीहरूलाई बहसमा उतारेको हो ।
गत वर्षदेखि बर्सेनि रूपमा विद्यार्थीहरूलाई सहभागी गराउँदै स्कुलले ‘मुन’ नामक उक्त कार्यक्रम गर्न थालेको हो ।
अघिल्लो वर्ष ४५ जनाको सहभागितामा कार्यक्रम गरेको स्कुलले दोस्रो संस्करणमा कक्षा ५ देखि १० कक्षासम्मका ७२ जना विद्यार्थीहरूलाई सहभागी गराएको कार्यक्रमका संयोजक तथा स्कुलका भाइस प्रिन्सिपल पवनसिंह राजपुतले जानकारी दिए ।
‘विभिन्न देशको प्रतिनिधिको भूमिका निर्वाह गराएर आयोजना गरिएको यो दोस्रो संस्करणको कार्यक्रम हो,’ उनले भने, ‘यस्ता कार्यक्रम संयुक्त राष्ट्र संघलगायतले विभिन्न समयमा गरिरहेका हुन्छन् । यो ट्रेन्डलाई पछ्याएर हामीले मुन नामक कार्यक्रम गरेका हौं ।’
कार्यक्रममा विद्यार्थीहरूले विश्वका विभिन्न राष्ट्रका बारेमा अनुसन्धान गरी विद्यमान समस्या, चुनौती र समाधानका बारेमा समूह बनाएर छलफल गरेका थिए ।
कार्यक्रममा विद्यार्थीहरूको समूहले विश्वमा भइरहेका विभिन्न समस्याका बारेमा छलफल गरी समाधानका विषयमा प्रस्तुति दिएको स्कुलका निर्देशक रोहितजंग थपलियाले जानकारी दिए ।
विद्यार्थीहरूको अन्तर्राष्ट्रिय समसामयिक मुद्दाहरूलाई बुझ्ने र सोच्ने क्षमताको विकास गर्न स्कुलले यस्तो कार्यक्रम गरेको उनको भनाइ छ ।
त्यसबाहेक विद्यार्थीको व्यक्तित्व विकासमा सघाउ पुर्याउन, अनुसन्धान र विश्लेषण क्षमता बढाउनका लागि गरिएको उक्त कार्यक्रमले आगामी वर्षहरूमा पनि निरन्तरता पाउने निर्देशक थपलिया बताउँछन् ।
‘आजको सबैभन्दा महत्त्वपूर्ण पाटो भनेको खोजी-अनुसन्धानमा अब्बल भई प्रस्तुतिमा निखारपन ल्याउनु हो, यसैले विद्यार्थीका लागि यस्ता कार्यक्रम जरुरी हुन्छ,’ उनले थपे ।
