दुहबी । लैंगिक समानता तथा सामाजिक समावेशीकरणका विभिन्न सय सूचक पार गर्दै दुहबी नगरपालिकाले दोस्रो स्थान हाँसिल गरेको छ ।
वरिष्ठ समाजशास्त्री डा. चन्द्र उपाध्याय तिम्सिनाले दुहबी नगरपालिकाको विभिन्न शाखाहरूसँग चरणबद्ध छलफल र पाँच समूहमा लिएको परीक्षणपछि उक्त नतिजा आएको हो ।
सूचकको आधारमा प्राप्त नतिजालाई तीन तहमा वर्गीकरण गरिएको थियो ।
कुल प्रतिशतको ८० प्रतिशत माथिलाई सर्वोत्कृष्ट, ६० देखि ८० सम्म दोस्रो र ४० देखि ६० सम्मलाई सामान्य भनी विभाजन गरिएको थियो ।
दुहबी नगरपालिकाले सम्पूर्ण सूचकमध्ये ६१.५ प्रतिशत प्राप्तांकसहित दोस्रो स्थान हासिल गरेको हो ।
दुहबीले नगर प्रमुख वेदनारायण गच्छादारको अध्यक्षतामा २०७८/७९ मा नै लैंगिक समानता तथा सामाजिक समावेशीतासम्बन्धी कार्यदल गठन गरेको थियो ।
उक्त कार्यदलले उपमेयर मेनुका खतिवडाको अध्यक्षता रहने गरी उपसमिति गठन गरी चरणबद्ध रूपमा यस क्षेत्रमा काम गर्दै आएको छ ।
नेपाल सरकारले वार्षिक बजेट तथा नीति कार्यक्रम बनाउँदा हरेक पालिकाको लिजाका आधारमा बजेट विनियोजन गर्ने हुँदा लिजाको लागि पनि यो सूचक महत्त्वपूर्ण डकुमेन्ट रहने छ ।
लैंगिक असमानता, सामाजिक बहिस्करण, भौगोलिक विभेदले जकडिएको समाजलाई समतामूलक ढंगले निर्माण गर्ने उद्देश्य नेपालको संविधान २०७२ को छ ।
संविधानको धारा १६ ले सबै ब्यक्तिहरूको सम्मानपूर्वक बाँच्ने हक, धारा ४२ ले सामाजिक न्यायको हक, धारा १७ ले स्वतन्त्रताको हक, धारा १८ ले समानताको हक, धारा ३८ ले महिलाको हक, धारा ४३ ले आर्थिक विपन्न, अशक्त असहाय एकल महिलालाई सामाजिक सुरक्षाको हक सुनिश्चित गरेको छ ।
त्यस्तै धारा ५१( ञ ) मा सामाजिक न्याय र समावेशीकरणसम्बन्धी नीतिको ब्यावस्थाका साथै धारा ५२ ले राज्यले गर्नुपर्ने दायित्वको ब्यावस्था गरेको छ ।
स्थानिय सरकार सञ्चालन ऐनको दफा २४ ले पालिकाले आफ्नो अधिकारक्षेत्रभित्रका लागि स्थानियस्तरका विकाश आवधिक, वार्षिक रणनीतिगत रूपमा मध्यकालीन तथा दीर्घकालिन योजना बनाई लागू गर्नुपर्ने कुरालाई कानुनी दायित्वको रूपमा ब्यवस्था गरेको छ ।
यसैलाई मध्यनजर गर्दै दुहबी नगरपालिकाले लैससाससम्बन्धी नीतिगत र ब्यवहारिक विषयलाई जोड्दै दुईदिने कार्यशाला गोष्ठीको आयोजना गरेको थियो ।
कार्यक्रममा दुहबी नगरप्रमुख बेद गच्छादारको अध्यक्षता रहेको थियो भने उपप्रमुख मेनुका खतिवडा, प्रमुख प्रशासकीय अधिकृत हिमालय बराल, वडा अध्यक्ष, कार्यपालिका सदस्य, विषयगत शाखाहरूको उपस्थिति रहेको थियो ।
कार्यक्रम महिला बालबालिका तथा जेष्ठ नागरिक शाखा दुहबीले संयोजन गरेको थियो ।
