विराटनगर । पछिल्लो समय गाँजा भारततर्फ छिराउन मोरङका विभिन्न नाका सहज बन्दै गएको छ ।
मंगलबार राति मात्र मोरङ प्रहरीले भारत निकासी हुँदै गरेको १ सय ५५ केजी गाँजा बरामद गरेको छ ।
को १ च ९५८२ नम्बरको स्कारपियोबाट गाँजा बरामद गरेको मोरङ प्रहरीले दुई युवकलाई पक्राउसमेत गरेको छ ।
पक्राउ पर्नेमा धरान उपमहानगरपालिका–१२ का २४ वर्षीय राहुल विश्वकर्मा र धनकुटाको सहिदभूमि गाउँपालिका–६ का १९ वर्षीय सुरज राई रहेका छन् ।
उनीहरूलाई पत्रकार सम्मेलन गरी सार्वजनिक गरेको प्रहरीले आफ्नो ज्यानै जोखिममा पारेर उनीहरूलाई समातेको बताएकाे छ ।
मोरङ प्रहरी प्रवक्ता डिएसपी वेदप्रकाश जोशीले न्यू इयर इभको मौका पारेर भारत निकासी गर्न लागिएको स्कारपियोले झन्डै प्रहरीलाई नै ठक्कर दिएको सुनाए ।
धनकुटाको शहिदभूमि गाउँपालिका र उदयपुरका विभिन्न स्थानमा खेती नै हुने गरेको गाँजा मोङरका विभिन्न नाका हुँदै भारत पुर्याइन्छन् ।
खेती हुने ठाउँमा प्रतिकिलो अन्दाजी ५ हजारसम्ममा पाइने गाँजा भारत पुर्याएपछि २० लाख रुपैयाँमा बिक्री हुन्छ ।
गाँजासहित पक्राउ परेका उनीहरूलाई आज नै मोरङ जिल्ला अदालतबाट लागुऔषध नियन्त्रण ऐन २०३३ अनुसार लागुऔषध मुद्दामा म्याद थप गरेको प्रहरीले थप अनुसन्धान थालेको छ ।
प्रारम्भिक अनुसन्धान अनुसार प्रहरी हिरासतमा रहेका चालक विश्वकर्मा र राईले कसैको लागि भरियाको रूपमा काम गरेको रहस्य खुलेको छ ।
पक्राउ परेकाको साथबाट सामसुङ, नोकिया र रेडमीको गरी ३ थान मोबाइल बरामद भएको छ, मोबाइलको कल डिटेलबाट गाँजा कारोबारीसम्म पुग्न सकिने प्रहरीको अनुमान छ ।
