दुहबी । सुनसरीको दुहबी नगरपालिकाले आयोजना गरेको प्रोफेसनल मेकअप बेहुली शृंगारसम्बन्धी एक महिने तालिम सम्पन्न भएको छ ।
नगरको आयोजना र गरिबी निवारणका लागि लघुउद्यम विकास शाखा दुहबीको संयोजनमा सञ्चालित बेहुली शृंगारसम्बन्धी स्तरवृद्धि तालिम आइतबारबाट सम्पन्न भएको हो ।
दुहवी नगरपालिकाले विभिन्न वडामा रहेका आठ जना शृंगारकर्मीलाई ग्रेड वृद्धिसम्बन्धी एक महिने शृंगार तालिम दिएको हो ।
तालिमलाई लघु उद्यम विकाश शाखाका वरिष्ठ उद्यम विकाश सहजकर्ता दिवेश चौधरी र सहजकर्ता शशिकला चौधरीले सहजीकरण गरेका थिए ।
एक महिनासम्म सफल तालिम सम्पन्न गर्ने शृंगारकर्मीहरूलाई दुहबी नगर प्रमुख वेद गच्छादारले प्रमाणपत्र प्रदानसमेत गरेका छन् ।
प्रमाणपत्र प्रदानपछि नगर प्रमुख गछ्दारले लघु उद्यमसँग जोडिएर दुहबी नगरपालिकाले धेरै युवा-युवतीलाई स्वरोजगारको मार्ग प्रशस्त गरेको बताएका छन् ।
हरेक नागरिक बेरोजगार नहुन र सिप सिकेपछि काम गरेर खाने वातावरण तयार होस् भनेर यस्ता तालिम आयोजना गर्दै आएको उनको भनाइ छ ।
हाल दुहबी नगरपालिकामा पाँच सयभन्दा धेरै स्वरोजगार ब्यावसायी लघुउद्यमि महिलाहरू छन् भने अपांगता भएका व्यक्तिहरू समेत स्वरोजगारको बाटोमा छन् ।
नगरपालिकाले तालिम र बिउ पुँजीस्वरूप रु ५० हजार दिएपछि उनीहरू आत्मनिर्भरताको बाटोमा उन्मुख छन् ।
दुहबी नगरपालिकाले ब्यावसायिक कृषि, लघुउद्यम र प्राविधिक शिक्षामा ठुलो लगानी गर्दै आएको छ ।
