विराटनगर । मोरङको विराटनगर महानगरपालिका-४ बरगाछीमा अवस्थित हेरिटेज इन्टरनेसनल स्कुलले आफ्नो पहिलो संस्करणको वार्षिक खेलकुद सप्ताह सम्पन्न गरेको छ ।
हेरिटेजले शनिबार आफ्नो स्कुल परिसरमा भव्य कार्यक्रमको आयोजना गरी ‘हेरिटेज स्पोर्ट्स मिट २०२४’ सम्पन्न गरेको हो ।
‘जहाँ मूल्यमान्यताका साथ सिकाइन्छ’ भन्ने मूल नाराका साथ खेलकुद सप्ताहको कार्यक्रमको समापन गरिएको थियो ।
सप्ताहब्यापी खेलकुद समापन समारोहमा विद्यालयले विभिन्न विधाका खेलमा अब्बल रहेका विद्यार्थीहरूलाई मेडल र प्रमाणपत्र वितरण गरेको थियो ।
साथै, कार्यक्रममा मार्चपास, पिटी डिस्प्ले, ड्रिल डान्स पनि देखाइएको थियो ।
स्पोर्ट्स मिटमा विद्यालयले ट्र्याक एन्ड फिल्ड इभेन्टमा १०० मिटर दौड, रिले दौड, स्किल रेसलगायत गराएको थियो भने टिम इभेन्टतर्फ स्तरअनुसार फुटबल, क्रिकेट, बास्केटबल गराएर विभिन्न विधाका खेलहरू गराएको थियो ।
यसैगरी, चेस, टेबलटेनिसलगायत प्रतियोगिता पनि गरिएको थियो ।
समस्त विजेता खेलाडीहरूलाई प्रमुख अतिथि युवा नेता मनोजविक्रम शाह, विशिष्ठ अतिथि मानव सेवा आश्रमका कोशी प्रदेश संयोजक नवराज केसी र अभिभावकको उपस्थितिमा मेडल तथा प्रमाणपत्र वितरण गरिएको थियो ।
यस्तै, प्रतियोगिताका उत्कृष्ट खेलाडीहरूलाई मेडल र प्रमाणपत्रसहित सम्मान गरिएको स्कुलका प्रिन्सिपल सुशान्त बानियाँले जानकारी दिए ।
विद्यालयले विजेता समूहलाई चार समूहमा विभाजन गरेको थियो । जसमा जल अर्थात् ब्लु हाउस, अग्नि अथवा रेड हाउस, वायु अर्थात् यल्लो हाउस र पृथ्वी अथवा ग्रीन हाउस गरी चार समूहमा विभाजन गरिएको थियो ।
जसअन्तर्गत ब्लु हाउस विजेता बनेको थियो भने यल्लो हाउस उपविजेता बनेको थियो ।
प्रथम र द्वितीय बनेका हाउसलाई क्रिकेटर ललित राजवंशीका बुबा जयनारायण राजवंशी, मानव सेवा आश्रमका प्रदेश संयोजक नवराज केसी, स्कुलका अध्यक्ष अरुणकुमार राठी र अमिश रेग्मीले कप हस्तान्तरण गरेको थियो ।
खेलकुद सप्ताहको समापनमा स्कुलले दुई फरक क्षेत्रका व्यक्तिहरूलाई पनि सम्मान गरेको थियो ।
मानव सेवा आश्रमका प्रदेश संयोजक नवराज केसी र राष्ट्रिय क्रिकेट टोलीका सदस्य ललित राजवंशीका बुबा जयनारायण राजवंशीलाई सम्मान गरिएको थियो ।
उनीहरूलाई स्कुलका म्यानेजिङ डाइरेक्टर अरुण राठी र अमिश रेग्मीले दोसल्ला ओडाएर सम्मानपत्रका साथ सम्मान गरेका थिए ।
अमिश रेग्मीले स्वागत् मन्तव्य राखेर सुरु भएको कार्यक्रम समापनमा बोल्दै अरुण राठीले अबको शिक्षा पठनपाठनमा मात्र सीमित नभएर अतिरिक्त क्रियाकलापसहितको हुनुपर्ने बताए । उनले व्यवहारिक शिक्षा आजको आवश्यकता रहेकोसमेत बताए ।
स्कुलका डाइरेक्टर वर्णिका राठी हेरिटेजले मूल्य-मान्यतासहितको शिक्षालाई जोड दिइरहेको बताइन् ।
साथै विशेष धन्यवादका साथ बोल्दै स्कुलका प्रिन्सिपल सुशान्त बानियाँले अबको शिक्षामा हेरिटेजले फट्को मार्नेमा आफू विश्वस्त रहेको सुनाए ।
