विराटनगर । प्रतिनिधिसभा सदस्य भगवती चौधरीले नेपाल–इजरायल संसदीय समितिको संयोजकको जिम्मेवारी पाएकी छन् ।
सुनसरी निर्वाचन क्षेत्र नम्बर ३ की सांसद चौधरीलाई संसदीय मैत्री समूहको कार्यविधि २०८० बमोजम नेपाल–इजरायल संसदीय मैत्री समितिको संयोजकको जिम्मेवारी दिइएको संसद सचिवालयले जानकारी दिएको छ ।
सचिवालयका अनुसार समूहको सदस्यहरूमा नेपाली कांग्रेसका सांसद टेकबहादुर गुरुङ र गोपालकुमार बस्नेत, नेकपा एमालेका प्रेमबहादुर महर्जन र इश्वरी घर्ती तथा नेकपा माओवादी केन्द्रका महेन्द्रबहादुर शाही छन् ।
प्रतिनिधिसभाका सभामुख देवराज घिमिरेले विदेशी मुलुकसँगको संसदीय सम्बन्धलाई थप बलियो बनाउने गरी अघि बढ्न संसदीय मैत्री समूहका संयोजकहरूसँग आग्रहसमेत गरेका छन् ।
बिहीबार सिंहदरबारमा संसदीय मैत्री समूहका संयोजकहरूसँगको छलफलका क्रममा उनले संसदीय मैत्री समूहका संयोजकहरूसँग यस्तो आग्रह गरे ।
नेपालको संसदले विभिन्न ४१ देशका संसदसँग सम्बन्ध बिस्तारका लागि संसदीय मैत्री समूह बनाई संयोजकसमेत तोकिसकेको र बाँकी ३ वटा संसदीय मैत्री समूहको संयोजक छिटै तोक्ने सभामुखले जानकारी दिएका छन् ।
चौधरी पूर्वमन्त्रीसमेत हुन् । नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ नेतृत्वमा रहेको मन्त्रीमण्डलमा चौधरीले महिला, बालबालिका तथा ज्येष्ठ नागरिक मन्त्रालयको जिम्मेवारी पाएकी थिइन् ।
महिला आर्थिक सशक्तीकरणकी अभियन्तासमेत रहेकी सांसद चौधरीले २०६४ सालको संविधान सभामा विज्ञ सदस्यका रूपमा रहेर संविधान लेखनमा समेत योगदान पुर्याएकी छन् ।
३० वर्षदेखि लगातार महिला आर्थिक सशक्तीकरण, समाजसेवा गर्दै आइरहेकी चौधरी नेकपा एमालेको केन्द्रीय सदस्य हुन् ।
उनले ग्रामीण महिला उत्सुकता विकास मञ्च (फरवार्ड नेपाल) मार्फत गाउँगाउँमा रहेका महिलाहरूलाई सामाजिक, सांस्कृतिक विभेदहरू विरुद्ध सचेतना फैलाउने कार्य गर्दै महिलालाई आर्थिक सशक्तीकरणमा जोडेकी छन् ।
उनले गरिब, विपन्न र पछाडि परेका महिलाहरूको आर्थिक उन्नतिका लागि फरवार्ड माइक्रोफाइनान्स र फरवार्ड नेपालमार्फत लघुवित्त कार्यक्रम, वित्तीय साक्षरता, सीपमूलक तालिम लगायतमा काम गर्दै आइरहेकी छन् ।
