विराटनगर । मोरङको बूढीगंगा गाउँपालिकामा अवस्थित रेवन्त–रुक्मणि मेमोरियल विराट क्यान्सर इन्स्टिच्युटले ‘बेल अफ सेलिब्रेसन’ को उद्घाटन गरेको छ ।
विराट मेडिकल टिचिङ एन्ड टिचिङ अस्पतालमा मंगलबार एक कार्यक्रमको आयोजना गर्दै विराटका अध्यक्ष प्रा. डा. ज्ञानेन्द्रमानसिंह कार्की र उपाध्यक्ष इरिना कार्कीले बेल अफ सेलिब्रेसनको उद्घाटन गरेका हुन् ।
क्यान्सरका बिरामीलाई हौसला र मनोवल प्रदान गरी उनीहरूलाई आशा जगाउन विजय सूचक घण्टीको उद्घाटन गरिएको हो ।
गत असार १२ गते गठन गरिएको इस्टर्न क्यान्सर सर्भाभर सपोर्ट ग्रुपको अगुवाइमा उक्त घण्टीको उद्घाटन भएको हो ।
सो ग्रुपका सहजकर्ता कमल पौडेलका अनुसार अब यस इन्स्टिच्युटमा उपचार थाल्दा, क्यान्सरबाट विजयी प्राप्त हुँदा क्यान्सर सर्भाइबरहरूका लागि घण्टी बजाइने छ ।
क्यान्सर संक्रमितहरूलाई हौसला प्रदान गरेमा रोगलाई जित्ने सम्भावना बढी हुने बताउँदै उनले मनोवन प्रदान गर्ने प्रयासस्वरूप अस्पतालभित्र घण्टीको स्थापना गरिएको सुनाए ।
‘क्यान्सर शब्द भयावह भएको छ, त्रासले गर्दा मान्छे मर्ने सम्भावना छ, उनले भने, ‘क्यान्सरसँग डटेर लड्ने प्रण गर्नुपर्छ भन्ने सन्देश हामीले दिन खोजेको हो । क्यान्सर पूर्वजन्मको पाप पनि होइन । जेनेटिक, खानपान, विकिरणका कारण क्यान्सर हुन सक्छ । क्यान्सरसँग भाग्ने, डराउने होइन ।’
विराट क्यान्सर इन्स्टिच्युटकी अन्कोलोजी नर्स रोजिना तिमल्सिनाले क्यान्सर संक्रमित बिरामीलाई नजिकबाट हेरिरहेको बताउँदै आफन्तको हेरचार, चिकित्सकको बोलीले पनि क्यान्सरमुक्त हुन सकिने बताइन् ।
पछिल्लो समय आफूहरूले उत्कृष्ट ढंगले काम गरिरहेका कारण पनि विराट क्यान्सर इन्स्टिच्युट रोज्नेहरूको संख्यामा बढोत्तरी भएको उनले सुनाइन् ।
विराट क्यान्सर इन्स्टिच्युटका सिइओ डेनिस कार्कीले ‘आशाः क्लोज द केयर ग्याप’ मार्फत् क्यान्सर रोगीको उपचार गरिरहेको बताए ।
उनका अनुसार गत वर्ष क्यान्सर अस्पतालको उद्घाटन भएयता २० हजार क्यान्सरका बिरामीको उपचार भएको छ भने दुई हजारभन्दा बढी क्यान्सरको सर्जरी भएको छ ।
यस्तै, विराट कलेजका अध्यक्ष ज्ञानेन्द्रमानसिंह कार्कीले राज्य संवेदनशील नहुँदा देशका लागि योगदान गर्न कठिनाइ भइरहेको सुनाए ।
‘प्राइभेटचाहिँ माफियाको हो भन्ने प्रवृत्ति बढेको छ,’ उनले भने, ‘क्यान्सर रोग पूर्ण रूपमा निःशुल्क होस् भन्ने हामी पनि चाहन्छौं । त्यसका लागि चाहिने औषधि र उपकरणका लागि राज्य अगाडि सर्नुपर्छ ।’
क्यान्सरका बिरामीलाई अहिले कोशी प्रदेश सरकारले दिएको एक लाख रुपैयाँ पर्याप्त नभएको उल्लेख गरे ।
छिमेकी मधेश प्रदेशमा तीन लाख रुपैयाँ सहयोग गर्नेगरेको उदाहरण दिँदै भने, ‘मधेशका नेताचाहिँ नेता, त्यहाँका जनताचाहिँ जनता । हामीचाहिँ गोरु हो ?’
यसैगरी, उनले देशभरिका स्वास्थ्यकर्मी बिरामी भएमा आफ्नो अस्पतालले निःशुल्क उपचार गरिदिने पनि घोषणा गरे ।
‘हामीलाई सबैभन्दा दुर्भाग्य के छ भने, चिकित्सक बिरामी भएमा सहयोग गरिदिन भन्दै अपिल पठाउने गरिएको छ । यो भन्दा दुर्भाग्य देशमा के हुन्छ र ? बरु, म घोषणा गर्छु, नेपालका कुनै पनि चिकित्सकहरू बिरामी भई इलाज गर्न असक्षम हुनुहुन्छ भने विराटले पूर्ण रूपमा हामीसँग भएका उपकरणहरूको सहायतामा उपचार हुने छ ।’
