विराटनगर । मोरङ प्रहरीले विराटनगरमा भएका दुई झगडामा संलग्न रहेका तीन जनालाई पक्राउ गरेको छ ।
मोरङ प्रहरीका प्रवक्ता प्रहरी नायब उपरीक्षक वेदप्रकाश जोशीका अनुसार शुक्रबार र शनिबार विराटनगरमा भएका ‘ग्याङ फाइट’ मा संलग्न रहेको आरोपमा उनीहरू पक्राउ परेका हुन् ।
विराटनगरको व्यस्त बजार ट्राफिक चोकदेखि उत्तरको मेनरोडमा रहेको बालाजी कपडा पसलका सञ्चालक ४३ वर्षीय विजय अग्रवालमाथि शनिबार दिउँसो आक्रमण भएको थियो ।
रुस्तम उप्रेती, रितिक साह, नितेन कटुवाललगायतका समूहले व्यापारी अग्रवालको पसलमा पुगेर निर्घात कुटपिट गरेका थिए । अग्रवाल विराटनगर–४ एयरपोर्ट लाइनमा रहेको तृष्णा रेष्टुरेन्टका सञ्चालक पनि हुन् ।
शुक्रबार राति तृष्णामा व्यापारी अग्रवाल र अर्का सञ्चालक अमन साहले रुस्तमलाई बाउन्सर लगाएर कुटपिट गरेको आरोप थियो ।
रेस्टुरेन्टबाहिर उप्रेतीले अपशब्द बोलेको भन्दै व्यापारी अग्रवालले बाउन्सर लगाएर बाहिर निकालेर कुटपिट गरेको उनीहरूको भनाइ छ ।
राति रेस्टुरेन्टबाहिर कुटपिट गरेको निहुँमा उप्रेतीसहितको १० देखि १२ जनाको समूहले अग्रवालको विराटनगर–९ मेनरोडमा रहेको कपडा पसलमै आएर आक्रमण गरेका हुन् ।
युवाहरूको आक्रमणबाट अग्रवालको टाउको र अनुहारमा चोटपटक लागेको छ ।
व्यापारी अग्रवाललाई उप्रेतीले एल्मुनियमको पाइपले कुटपिट गरेको सिसिटिभी फुटजेमा पनि देखिन्छ । पसलमा रहेको पाइप उचालेर पटक–पटक अग्रवाललाई प्रहार गरेको देखिन्छ ।
त्यसपछि विमल कार्कीले पसलको सिसामाथि चढेर हेल्मेटले प्रहार गरेको सिसिटिभी फुटेजमा देखिन्छ । मरणासन्न हुने गरी कुटपिट गरेपछि अग्रवालले जिल्ला प्रहरी कार्यालय मोरङमा जाहेरी दर्ता गराएका छन् ।
अनुसन्धानका क्रममा झडपमा संलग्न तीन जनालाई प्रहरीले नियन्त्रणमा लिएको हो ।
प्रहरीले घटनाको सुरुवात भएको एयरपोर्ट रोडस्थित तृष्णा रेस्टुरेन्टका दुई जना र घटनासँग जोडिएका अर्को पक्षका एक जनालाई पक्राउ गरेको हो ।
बब्लु अन्सारी, सुगम केशरी र रुस्तम उप्रेतीलाई नियन्त्रणमा लिइएको मोरङ प्रहरी प्रवक्ता जोशीले जानकारी दिए ।
पक्राउ परेका अन्सारी र केशरी तृष्णाका बाउन्सर हुन् ।
उनीहरूले ग्राहकका रुपमा पुगेका उप्रेती, गौतम भतग र गोपाल दासलाई सामान्य भनाभजको आधारमा निर्घात कुटपिट गरेको भिडियो सार्वजनिक भएको छ ।
त्यही घटनालाई रिसइबी बनाएर उप्रेती समूहले शनिबार व्यापारी अग्रवालमाथि आक्रमण गरेको थियो । आक्रमणमा संलग्न उप्रेतीलाई समेत पक्राउ गरेर अनुसन्धान थालिएको डिएसपी जोशीले बताए ।
