विराटनगर । सहकारी ठगी प्रकरणमा हाल हिरासतमा रहेका राष्ट्रिय स्वतन्त्र पार्टी (रास्वपा) का सभापति रवि लामिछानेको तस्बिर भन्दै अहिलर् सामाजिक सञ्जालमा एउटा फोटो भाइरल बनिरहेको छ ।
रवि यतिबेला कास्की प्रहरीको हिरासतमा छन् । सहकारी ठगी प्रकरणमा कार्तिक २ गते काठमाडौंबाट पक्राउ परेका रविलाई त्यसयता कास्की प्रहरीको हिरासतमा राखिएको छ ।
तर, यसबीचमा पूर्वगृहमन्त्रीसमेत रहेका रवि हिरासत कक्षमा सुतिरहेको भनेर सार्वजनिक भएको तस्बिरको वास्तविकता के हो भन्ने कौतुतहलाले जनमानसलाई सताएको छ ।
बुधबार रातिदेखि रास्वपा कार्यकर्तामार्फत भाइरल भएको सो तस्बिरको वास्तविकताबारे प्रहरीले छानबिन थालेको छ । फोटो सार्वजनिक गर्ने व्यक्तिको समेत खोजी थालेको कास्की प्रहरीले जनाएको छ ।
उक्त फोटो केही दिनअघि डा. निकोलश भुसाल नामक फेसबुक आइडीबाट पोस्ट भएको थियो । तर, अहिले उनले उक्त फोटो डिलिट गरिसकेका छन् ।
निकोलशले सो तस्बिर आफैँले खिचेको र कसैलाई दोषारोपण नगरेको भन्दै तस्बिर खिचेर सार्वजनिक गरेकोमा फेसबुकबाटै माफी मागेका छन् ।
निकोलश रविकै समर्थक हुन् । रविको फोटो आफूले खिचेको बताएका भुसालले यसमा कुनै खराब नियत नभएको भन्दै गल्ती महसुस गरेर माफी मागेका छन् ।
डा. भुसालले दुई दिन अघि नै यो फोटो फेसबुकमा राखेर पछि डिलिट गरेका थिए । बुधबार रास्वपाका सहकोषाध्यक्ष दीपक बोहराले त्यो फोटो फेसबुकमा राखेपछि अहिले भाइरल भइरहेको छ ।
यता, कास्की प्रहरीले यो विषयमा अनुसन्धान भइरहेको बताएको छ । ‘मैले पनि भर्खर देखेँ । के रैछ । यसबारेमा छानबिन गर्छौं,’ कास्की प्रहरी प्रमुख एसपी अजयबाबु ओलियाले भने ।
कास्की हिरासतको फोटो हो ? भन्ने प्रश्नमा उनले भने, ‘त्यो बारेमा पनि कन्फर्म भएको छैन । छानबिन गर्दैछौं ।
पूर्वगृहमन्त्री समेत रहेका रविलाई अन्य थुनुवा भन्दा फरक ठाउँमा राखिएको छ । अहिले रविको हिरासतमा सुतिरहेको फोटो भन्दै सामाजिक सञ्जालमा एक तस्बिर भाइरल बनेको हो ।
उक्त फोटो एक व्यक्ति सुतिरहेको देखिन्छ । साइडमा टेबल र त्यसमाथि किताब पनि छन् । अहिले सो तस्बिरलाई फरक फरक दृश्यसहित सोसल मिडियामा भाइरल बनाइएको छ ।
रास्वपा नेता दीपक बोहोराले सो तस्बिर रविकै भएको र टेबुलमा रहेको किताब कुरान नभएर फरिद जाकरिया आर्ट अफ लिभिङ भएको बताएका छन् ।
उनले तस्बिर कसले खिचेर कुन उद्देश्यले सार्वजनिक गरियो भन्ने प्रश्न आफूहरूको रहेको भन्दै यसले रविको सुरक्षामाथि समेत प्रश्न उठेको बताए । सुविधा सम्पन्न कोठामा रविलाई राखेको देखाउन यो तस्बिर लिक गरिएको आशंका रास्वपा नेताहरूको छ ।
