विराटनगर । सुनसरीको दुहबी नगरपालिका-८ मा कारको ठक्करबाट पैदलयात्रीको मृत्यु भएको छ ।
बुधबार साँझ ५:५० बजेतिर दुहबी-८ जुटमिलअगाडि भएको उक्त दुर्घटनामा स्थानीय ४५ वर्षीय गणेश गुप्ताको मृत्यु भएको हो ।
कोशी राजमार्गमा दुहबीबाट इटहरीतर्फ जाँदै गरेको बागमती प्रदेश ०१-०२७च ०४८२ नम्बरको कारले पूर्वबाट पश्चिमतर्फ बाटो काट्दै गरेका गुप्तालाई ठक्कर दिएको थियो ।
कारको ठक्करबाट गम्भीर घाइते भएका उनलाई उपचारका लागि विराट टिचिङ अस्पताल बूढीगंगा ल्याइएको थियो । उपचारका क्रममा उनको हिजो बेलुका ७ः१८ बजेतिर मृत्यु भएको प्रहरीले जनाएको छ ।
कार चालक मोरङको सुन्दरहरैंचा नगरपालिका-३ बस्ने अन्दाजी २४ वर्षीय रामनाथ जोगी इलाका प्रहरी कार्यालय, इटहरीले नियन्त्रणमा लिएको छ ।
कार भने इलाका प्रहरी कार्यालय दुहबीको नियन्त्रणमा छ । तीव्र गतिमा कार कुदाउँदा दुर्घटना भएको प्रहरीको प्रारम्भिक अनुसन्धानले देखाएको छ ।
